Corpus Van Reenen-Mulder (CRM14): Oorkonde E579r38801

Aelbrecht bercmer en_ aelbrecht die weent Scepene In beuerwiic orconden dat wj daer ouer en_ aen ware_ alse scepene voers_ daer claes ysebrants zoen huyerde tieghens heren aelbrecht van jwtfaes . monic en_ rentemeester des abts van egmonde . een hofstede legghende jn beuerwiic in die afterbuyert en_ bileghen hebben met erue an die zwtside dieduwaer pieter roelofs soens met eenre hof~stede die sy in huyerwaren hout van den abt van egmonde . en_ baue gharbrants an die noertzide . met eenre hofstede die sy in hueyrwaren hout van + den abt voerscreue_ streckende voer van des Coenincs wech tot after alsoe verre als die twnsloet bigrepen heft . om viif scellinghe vryes ghelts tsiaers enen oude_ vrancriicschen scilt . voer een pont gherekent . en_ alle payment daer na te rekenen bi scellinghen en_ bi pe_ninghen jaerlix te bitalen in die wiic op sente bauen dach . en_ dese huyre sal duyren neghen iaer lanc en_ sel wtgaen tot alre heyligher misse die comen sal in den jaer ons heren dusent drie + ho_dert en_ seuen en_ neghentich . en_ dan soe sal dese voersc_ hofstede weder vry comen an den abt van egmonde voersc_ jn orconde desen brieue bizeghelt met onsen zeghelen jnt jaer ons heren dusent drie + hondert acht en_ tachtich op sente barthelmyeus dach . .