Corpus Van Reenen-Mulder (CRM14): Oorkonde E579r38802

Aelbrecht bercmer en_ aelbrecht die weent Scepene jn beuerwiic Orconden dat wi daer ouer en_ aen waren alse scepene voersc_ . daer machtelt jacop die pelsers . huyerde tieghens heren aelbrecht van jwtfaes monic ende . Rentmeester des abts van Egmonde een hofstede legghende jn beuerwiic in die afterbuyert en_ bileghen hebben met erue aechte coruers an die zwtside . met eenre hofstede die sy in huyer~ware_ hout van + den abt van egmo_de ende joncfrou katrine van aderkem an die noertside met eenre hofstede die sy in hueyrware_ hout van + der memory~lant van egmonde . streckende voer van des Coenincs wech tot after an ysebrant claes zoens wal om achte scellinghe vryes ghelts tsiaers ene_ oude_ vrancriicschen scilt gherekent voer een pont . en_ alle payment daer nae . te rekene_ bi scellinghen en_ bi pe_ni_ghen . jaerlix te bitalen in die wiic op sente bauen dach . en_ dese huyre sal duyren neghen iaer lanc en_ sel wtgaen tot alre heyligher misse die comen sal in + den iaer ons heren dusent drie hondert seuen en_ neghentich en_ dan soe sel dese voersc_ hofstede weder vry comen an den abt voersc_ In Orconde desen brieue bizeghelt met onsen zeghelen jnt jaer ons heren dusent drie + hondert acht en_ tachtich op sente bartholmyeus dach .