Corpus Van Reenen-Mulder (CRM14): Oorkonde E579r38803

Aelbrecht bercmer en_ aelbrecht die weent scepene in beuerwiic orconden dat wi daer ouer en_ aen waren alse scepene voersc_ . daer huyghe boene en_ Jonc claes . huyerde_ tieghens heren aelbrecht van jwtfaes monic en_ Rentemeester des abts van Egmonde een hofstede legghende in beuerwiic in die groete strate metten twn after . en_ bileghen hebben met erue . ghiertrwt duden nv ter tiit met eenre hofstede die sy ghehuyert heft tieghens mathiis claes zoen en_ mathiis claes zoen voersc_ an liifrenten heft van den goetshuse van egmonde an die noertzide en_ dirc van duynens kinder met eenre hofstede die sy ghehuyert hebben tieghens gherit hoflant en_ gherit hoflant voersc_ in lyen hout van + den goetshuse van egmonde an die zwtsyde streckende . voer van der haluer strate tot after an dirc heynen zoens twn . om acht end_ + twintich scellinghe vryes ghelts tsiaers . ene_ oude_ vrancriicschen scilt voer een pont gherekent . en_ alle payment daer + na te rekenen bi scellinghen en_ bi penninghen Jaerlix te bitalen . in die wike op sente bauen dach . en_ dese huyre sal duyren neghen iaer lanc en_ sel wtgaen tot alre heyligher misse die comen sal in den iaer ons heren dusent drie + hondert en_ seuen en_ neghentich En_ dan so sal dese voersc_ hofstede weder vry comen an den abt van egmonde voerscreue_ In orconde desen brieue bizeghelt met onsen zeghelen jnt jaer ons heren dusent drie + hondert acht en_ tachtich op sente bartholmyeus dach .