Corpus Van Reenen-Mulder (CRM14): Oorkonde E597r34101

Vy scoute scepene en_ Raet van haerlem orconden mit desen brieue / dat voer ons quam ghisebrecht Janssone onse poerter / en_ make besettede en_ bewijsde mit goeder voerdachticheit ene capelrie ewelike staende die hi wille dat me_ verdiene in onser vrouwen broederkerke te haerlem daer hi toe bewijsde gaf en_ opdroech der voerseider capelrien te vryen eyghen alsulc erue en_ rente_ als hier na ghescreue_ staet / Eerst viere made lants die hi heeft legghende an die poert van haerlem in den wert die nv rente_ twee + en_ + vijftich scellinghe hollandsce siaers Item in zassene_rebroec op balgherijt ene_ camp lants die nv ghelt drie pond hollands siaers Item te zassenem in scoterbroec mabelien~camp die nv rent viertich scelling_ hollands siaers . Item bi + den selue_ mabelien~camp op vlienesse viere hont lants die nv ghelden tyen scellinghe hollands siaers Item op agghevoerd an + die ghiest in lisse recht een stuc lants dat twalef scellinghe hollands nv ghelt siaers / Item tot elsghiest an disside reynsburch een stuc lants dat nv ghelt . drie + en_ + dertich scellinghe hollands siaers Van wilker capelrie voernoemt ghisebrecht voerseit wille bliue_ patroen en_ gheuere alse + langhe als hi leeft / en_ na sine doet wil + hi dat die kerkemeest_s der kerke van haerlem die dan ter tijt vore en_ na wesen sullen dieselue capelrie voert~an ewelike gheue_ ? horer zielen ene_ p_sone dies werdich is jn orc_nde deser ? die + hier vo_e en_ na ghescreu_ sijn hebbe_ wi . desen brief bezeghelt mit onser poerte~zeghel van haerlem / en_ ghisebrecht janssone voerscreue_ mit sine_ zegle . En_ Ic Ghisebrecht janssone voerseit belye mit desen brieue dat ic die voerseide capelrie ghemact hebbe en_ ? erue en_ rente_ als voerscreue_ is daer + toe ghegheue_ en_ opghe~draghen hebbe te vryen eyghen in allen maniere_ en_ mit al + den pointe_ die voerscreue_ sijn / dit hier + toe ghedaen waert dat ic noch te~rade~worde dat ic die capelrie tot eenre ander stede binne_ haerlem ordenere_ woude te v_diene_ dat ic dat wel doen mochte en_ mach daer en_ also yc te rade worde / en_ oec waert dat na mine doet die capelaen van der capelrie sulke voerderinghe en_ reedscap niet en hadde in + der broeder~kerke voers_ die capelrie te verwaren als hi billike hebben soude / en_ dat den kerkemeest_s van haerlem dochte die dan gheuers en_ p_senteres van der capelrien wesen sullen so willic dat si die capelrie trecken en_ trecken moghen / tot eenre ander stede binne_ haerlem daer him goet sal denken bi horen zielen Wilke capelrie Jc gheue mit desen brieue jn den name gods ene_ eersame_ man he_n piete_ henrix cost_ssone van sgraue_~zande priest_ puirlike om gods wille En_ p_sentere dien selue_ he_n piet_ tot der seluer capelrie ene_ eersame_ vader in gode die ghecoren is te . Bisscop tot vtrecht iof den ghene_ die des in sine_ steden is / en_ bidde him dat hi dese capelrie wille confirmere_ en_ den p_senterden capelaen admitteren . Jn orconde alle deser ding so hebbic Ghisebrecht jans sone mine_ zeghel an desen brief ghehanghen bi onser poertezeghele van harlem Ghegheue_ jnt jaer ons he_n dusent drie + hondert een + en_ + viertich op onser vrouwen auend dat si gheboren was -