Corpus Van Reenen-Mulder (CRM14): Oorkonde E597r36301

Wj symon van waterland en_ claes hedding Scepene jn haerlem / wouter van heylighelo En_ claes van adykendam manne ons liefs he_n des abts en_ des godshuus van Egmonde / maken cont allen luden dat voir ons quam Erkentruud dircx dochter van Wymme_ne_ En_ op~droech ysebrande van der scure alle goet alle erfnesse alle recht en_ hantvesten met haers monbaers hant / dat sy heeft of cryghen mach an dien goede dat femeynsen horer Ouder~moeder liiftochte was die gheriid he_n arends~zoe_s wiif was / welc goet gheleghen is tot Egmonde En_ te Lymmen / En_ belyede dat hoer ysebrant voirsc_ aldaer of al vol~ghedaen heft en_ al bitaelt den lesten pe_ning metten eersten In oerconde desen brieue bizeghelt met Onsen zeghelen jnt jaer ons he_n mccc drie en_ tsestich op sinte mychiels dach