Corpus Van Reenen-Mulder (CRM14): Oorkonde E668r38201

Jn + den name goods amen Jc aernd van duuenvoerde Ridder Doe Cond allen luden dat Jc machtich mijnre sinnen ende wetende mijnre reden make ende ordinere mijn testament Ende minen vtersten wille In allen manieren als hier na ghescreuen staet In + den Eersten so is mijn vterste wille dat mijn boden Ende alle scult die Ic kenliken sculdich ben met mijnre wtvaert voer al betaelt worden Voert so bespreec Jc den cappellaen te voerscoten die nv is of hier~namels wesen sellen dertich scell_ tsiaers alle jare in te nemen van (onleesbaar) camp drye~warue die weke te gaen tot minen graue Ende mijnre zielen te ghedenken als hi misse doet Item den persoenre te voerscoten bespreec ic ter paepliker prouen tien scell_ tsiaers of vijf pond Renten mede te copen mijnre zielen te ghedenken wanneer hi misse doet It_ den goeds~huse te voerscoten vijf scell_ tsiaers of vijftich scell_ daer voer Item den heylighen gheest te voerscoten twie ende twintich penninghe tsiaers op enen acker lants legghende onder Jan baertouts soens hws Item der costerien te voerscoten . tien . scell_ tsiaers ostyen ende wijn mede te copen of vijf pond daer voer Item den vijf biddende oerden elc kouent . tien . scellinghe Item den cloester te reyseburch . tien . pond een pond tsiaers mede te copen mijn memorien mede te doen Ende dat pond den vrouwen jaerlix te gheuen jn hoer hant Item so bespreec ic den armen hws~sitten te voerscoten vier ende twintich pond (onleesbaar) die wonen twischen sinte nyclaes huuscgen ende voppen van + den bosche Ende die te gheuen bi minen testementoers binnen siaers om mijnre ziele willen It_ minen wiue dat beste bedde met tween den besten dekenen twe die beste paer slaeplaken twie die beste oercussen Ende al hoer cleder die te horen liue behoren Ende hier jeghen So willic dat aernd ende dirc mine kinder hebben haer haernasche ende al dat te haren liue behoert Ende haer paerde met haren toe~behoren It_ dirc minen sone minen grawen heynst Ende aernd minen sone een jonc swart vool dat te jans van noortich staet op die mersche Item Claes minen bastaert zone vier pond holl_ns tsiaers vten tiende te eyken~dunen van aernd minen sone te houden tot enen rechten lieue hem alle jaer wt te reyken als die daghe van + den tiende verscinen It_ haren florijs aernts sone vier pond tsiaers op mijn deel van + den Renten die gheleghen sijn opt veen ende mi aenquamen van jan bogghen die god ghenadich zij durende also langhe als heer florijs voers_ leeft ende na sinre doet weder te comen an mijn rechte erfname Ende hier of hebbic ghecoren testementoers te wesen meester jan van loeuen he_e bartholmees van Raphurst ende jan van + der boechoerst In wilker testementoers hande Ic op~ghedraghen hebbe ende op~draghe alle mine goede waer zij gheleghen sijn toter aellingher betalinghe des testements voerscr_ behoudeliken mi dit testament ende vterste wille te verwandelen te meerren te minderen of al te weder~roepen also dicke Ende tot welken tiden alst mi redeliken denken sel In kennessen der waerhede hebbe jc desen brief beseghelt met minen zeghel Ende om die meerre sekerheden hebbe jc ghebeden Ende bidde meester jan he_en bartholmees en_ jan van der boechoerst testementoers voerscr_ dat sij dit mede met mi beseghelen willen met haren zeghelen Ende dit testament wt minen goede betalen willen In allen formen ende manieren als voerscr_ is ende wi jan van loeuen meester bartholmees van Raphurst Ridder Ende jan van + der boechoerst knape voerscr_ om bede willen he_en aernds ons neuen voers_ Ende om~dat wi dese testementoerscip voers_ an~nemen ende meenen wel te voldoen jn allen manieren als voerscr_ is so hebbe wi desen brief mede beseghelt met onsen seghelen Int Iaer ons heren dusent drye + hondert twee ende tachtich des manendaghes beloken paeschen