Corpus Van Reenen-Mulder (CRM14): Oorkonde E691r39201

@ @ Alle den ghenen die dezen brief zellen zien of horen lezen . doe ic v_staen / ghizebrecht gheylinc hermans zoen / Scoute in den westbroec @ in + der vrouwen gherechte van zulen / dat voer mi en_ voer die lantghenoten / ende buere / die hijr na bescreuen staen / quam jnt gherechte @ gherijd lubbrechts zoen / Ende begheerde Eens ordeels / of die ander + halue viertel lants / also alse gheleghen is / in + den westbroec / in + den ghe-rechte voerscreuen / . Streckende van + den ouden wech / aen den nederen wech / Tusschen lande / der vrouwen van + den dale / aen die ouer~zide / @ + ende tusschen lande der heren van oudemunster tutrecht / aen die neder~zide / also vry en_ also los zine ware_ / dat hi die mochte verzetten @ verzellen / en_ den vryen eyghendom of~gheuen / dien hi woude / en_ hem wart ghewijst / mit rechte / en_ mit ordele / dat hijt wel doen @ mochte / ende dat die ghifte mit rechte stadicheyt hebben zel ? dat ghedaen was / doe gaf gherijd lubbrechts zoen vorghenoe_t / @ + johan reynaers zoen borgher tutrecht / tot behoef / den ? beghinen van + den beghiinhoue Tutrecht / den vryen eyghendom van @ der ander + halue viertel lants voerscreuen . Ende ? ? of / tot behoef der beghinen voerscreuen / alse recht en_ ordele @ wijsde / dat hi sculdich was te + doen / endet mitten ? ? hebben zel . / Mede zo is mi enten lantghenoten en_ bueren @ kenlic / dat vrederic Marten en_ ioncfrou gherijd (onleesbaar) ? bonterocs dochter / mit zamender hant / jacob van + den velde / @ + voer hem / en_ voer ioncfrou aleyden zinen wiue des ? ? dochter / daer hi tot dier tijd wittelike boerte bi hadde / @ + ende joncfrou Elborch peter bonterocs dochter ? ? ? bonterocs hant hoers oems / en_ hoers gheboren mombaers / @ + ouer~ghegheuen hebben / den voerseyden gherijd ? ? ? vryen eyghendom van + den lande voerscreuen / en_ daer of verte-ghen hebben tot gherijd lubbrechts zoens behoef ? / alse recht wijsde / . . hijr waren over en_ ane / doe dit gesciede / @ + vrederic Marten / ghizebrecht de craen / roelofs zoen / . peter ? wiel / ghizebrecht gheylinc gheylinc hermans soons soen / jan mant lantghe-note_ en_ buere / in + den gherechte voerscreuen / en_ anders veel goeder lude / Ende op~dat dit vaste en_ stade bliue / zo hebben wi / vrederic @ Marten en_ ghizebrecht de craen / lantghenoten voerscreuen / onze zeghelle aen dezen brief ghedaen / Tenen orconde / want wi hijr @ mede ouer en_ ane gheweest hebben / alse voerscreuen is / En_ want wi ghizebrecht gheylinc hermans zoen Scoute Peter van wiel / @ + ghizebrecht gheylinc gheylinc hermans zoens soen / en_ johan mant / voerscreuen / op deze tijd selue ghene zeghelle en hebben / zo hebben @ wi ghebeden / willam van boechout / amptman / der vrouwen van zulen / . dezen brief ouer ons te + bezeghellen / mit zinen zeghel / @ + En_ ic willam van boechout voerzeyt hebbe om bede wille / ghizebrecht gheylincs des Scouten / peters van wiele / ghizebrecht @ gheylincs / gheylinc hermans zoens soen / en_ iohan mant vorghenoe_de / minen zeghel aen dezen brief ghedaen / Tenen orconde / gheghe-uen jnt jaer ons h_en duzent + / dre + hond_t + / twe en_ tneghentich / op zinte gheertruden dach . ~