Corpus Van Reenen-Mulder (CRM14): Oorkonde E692r33301

@ @ Wi Rycoud van hesewiic bi + der ghenaden goods . Proefst tot sinte peter tutrecht / doen te v_staen allen luden / o_me~dat eersame lude @ die here van yselsteyne en_ sine maghe / sine kindre / en_ hore maghe van der eenre side / en_ iohans maghe van den zande van d_ ander @ side an ons ghebleuen siin eenre zoene en_ eens zegghens / van dode haren hartbarens van yselsteyne ridders / en_ iohans van den @ zande daer god de zielen of hebben moete / So zegghen wi jn den eersten van desen vorghenoemden doden ene alinghe zoene tot @ allen zoenen rechte / van allen des voerseyden haren hartbarens maghen / en_ hulperen van der eenre side / en_ des voerseyden iohans @ maghen en_ hulperen van der and_ side / sonder wtghenomen alle haren aelbrechte van iutfaes . . Canonic tot sinte johanne tutrecht @ en_ sine maghe die iohanne van den zande nyet en bestonden / en_ daer wi oec gheen zegghen in handen of en hebben / . . Voert so zegghe @ wi dat iohans maghe van den zande een outaer maken sellen of doen maken in die kerke tot yselsteyne / en_ dat renten sellen @ tot sestien ponden toe siaers suart_ tornoyse / den goeden groten coninx tornoysen voer sestien pe_ninghe ghereke_t / an goeden @ zekeren erue dat gheen dijc~goet en is / gheleghen tusschen der noede en_ bodegrauen aen die zide van der lecke daer vtrecht @ leghet / also dat dien outare vast en_ stede bliue / En_ dit sellen si vol doen alse voerscreuen is tusschen hiir en_ sinte remeys @ dach naest toecomende / also dat men de renten van dien erue volcomelike op~boren mach tot sinte martiins misse en_ tot @ sinte peters misse die daer naest comende siin / en_ also voert iaerlix / . En_ van dien voerseyden outare zegghen wi die ghifte toe @ ghisebrechte haren hartbarens sone van yselsteyne / en_ sinen rechten erfname_ na sire doot die van yselsteyne gheboren siin ewe-liken te bliuen . . Voert~meer so zegghe wi dat des voerseyden johans maghe van den zande maken sullen binnen den naesten sinte @ remeys dach an zekeren erue dat gheen dijc~goet en is gheleghen tusschen der noede en_ bodegrauen alst voerscreuen is / . . @ + viertich grote tornoyse iaerlix / der kerken tot sinte marien tutrecht eweliken te bliuen in haren hartbarens memorie @ vorghenoemt / En_ hiir mede zegghen wi dese vorghenoemde partyen en_ alle hore hulpers an beden siden alse voerscreuen is witte-liken en_ wel v_soent / En_ om alle twist en_ onminne te scutten die in deser zoene gheuallen mochten / so zegghen wi enen alinghen @ vrede tusschen beden partyen vorghenoe_t en_ alle horen hulperen an beden siden alst voerscreuen is / een iare durende na der @ zegghen / of namaels enich stoot hiir in gheviele van enigher side / dat wi dat houden tot onser v_claringhe . . jn orconde @ deser dinghe / so hebben wi rycoud . . proefst tot sinte peter vorghenoemt desen brief beseghelt mit onsen seghel / . . gheghe-uen int iaer ons heren dusent dre + hondert en_ dre en_ dertich op alre heylighen auont