Corpus Van Reenen-Mulder (CRM14): Oorkonde E692r37701

@ @ Alle den ghenen die desen brief zellen sien of horen lesen doe + ic verstaen ghisebrecht van walenborch Canonic ende scolaster ten doem @ tutrecht / dat ic verhuert hebbe / ende in erfpacht ghegheuen hebbe / ende gheve mit desen opene brieue johan brand ende sinen @ rechten erfnamen na hem / die achtendeel lands die ic teghen hem ende sinen wiue gouden Cofte gheleghen in middelveld in der @ kerspel van Coten in des doemproofsts gherechte van vtrecht / ende mede den doemproofst tinset daer bouen naest gheland @ siin de heren van + den doem / ende vrederic de langhe beneden / alse dat achtendeel gheleghen is mit al sinen toebehoren / Elx iaers @ om twintich lood ghoets fiins puurs zuluers van + der wichte der stat van vtrecht / of die weerde daer voor / te + betalen mi of @ den ghenen daer ict op + wise de ene helft tot sinte martiins misse in den winter ende de ander helft tot sinte peters misse ad @ Cathedram daer naest comende / ende also voort alle iaer in der stat van vtrecht / vriis ghelts op horen anxst ende Cost sonder @ enigherhande ofcortinghe van enighen zaken of ongheval dat op desen lande Comen mach Ende waert dat iohan brand / of siin @ erfnamen na hem dese twintich lood zuluers tot elken termine of binnen viertien daghen daer na nyet en betaelden @ / ende mede den tins ende mond~ghelt ende batghelt / ende al onghelt dat op desen lande staet ende noch daer op vallen mochte @ tot elken daghe alse men die betalen pleghet / also datter mi scade of quame of ghebrec / so velle hi ende siin erfnamen van allen @ rechte dat ic hem an desen lande gheve of ghegheuen hebbe / behouden nochtan mi / often ghenen dien ict bewisde an iohan brand @ of an sinen erfnamen na hem wat mi onbrake van minen pachte / ende wat scade dat ic lede dat hi des tins oft mond~ghelt @ ende batghelt ende al onghelt nyet betaelt en hadde tot horen daghen alse men pleghet te + betalen mi of den ghenen daer ict @ op wisede / of vercofte of versellede tot ons selfs waerheyt / Voort siint vorwaerden dat iohan brand / ende siin erfnamen voorseyt nyet verquaden / of vermynren zellen van enighen wilghen / of bomen / of husinghe die daer nv op staen / of daerop Comen ten waer bi minen wille / of der gheenre daer ict wisede / mer altoos die hofstede ende dit land voorseyt te + beteren @ jn oorconde des briefs beseghelt mit minen seghel / ghegheuen int iaer ons heren dusent dre + hondert seven ende tseuentich des @ saterdaghes na des sacraments dach