Corpus Van Reenen-Mulder (CRM14): Oorkonde E692r39802

@ @ Wj cureyten ente ghemene ghezellen die gherent ziin in + der kerken tot buerkerke tutrecht doen cont en_ @ kenliken allen luden dat wi voer~huert ende in pachte ghegheuen hebben / aernt willams zoen zeuen morghen @ lants alzo alze gheleghen ziin tot bvnnic op meervelt daer bouen naest ghelant is joncfrou lyzebet die @ wouters wiif was van wede / ende tydeman droem beneden tot tien jaren toe gherekent van zinte lambrechts misse naest comende Elx jaers om een ende twintich pont achte dordrechtsche placken voer @ elc pont om viif hoenre ende om twe capoene / te betalen die een helfte van + den ghelde mitten capoene_ @ ende hoenren voerscreuen tot zinte martiins misse in + den winter alze van nv zinte martiins misse @ in + den winter naest comende ouer een jaer ende die ander helfte van + den ghelde tot zinte peters @ misse @ ad cathedram daer naest comende / Ende alzo voert jaerlix deze voerzeyde tien jaren wt @ Mit zulken vorwarden dat aernt voerzeyt dit voerzeyde lant verwaren zel op sinen cost van allen @ ouden werke wtghenomen lantghenoten ghelt / Maer waert dat daer enich nywe werc op viel dat zel @ aernt voerzeyt voer wtlegghen ende wi zellent hem weder ofcorten van + den eersten pachte Voert @ zo ziint vorwarden dat hi ons jaerlix ghoede borghen zetten zel binnen vtrecht voer zinte johans dach te + middezomer voer een jaer toe~comende pachts waert dat hi des nyet en dede zo viel hi van dezer huerwere @ ende Claerliken van alle rechts ende toezegghens dat hi hadde an + den lande voerscreuen ende dat zelue @ lant coemt dan vry ende ledich weder aen ons onzen vryen wille daer mede te + doen alzo verre alze @ wiit op~nemen willen ende anders nyet behoudelic ons nochtans alle ons verzetens pachts ende behoudelic mede dat die borghen die hi ons dan ghezet hadde nochtans behaft bliuen zouden voer een @ jaer pachts van + den jaer daer hiit in verzumede zonder arghelist Ende op~dat dit vaste en_ @ stade bliue zo hebben wi dezen brief bezeghelt mit onzen ghemenen zeghel ghegheuen jnt jaer @ ons heren duzent dre + hondert achte ende tneghentich des manendaghes na zinte mathiis dach