Corpus Van Reenen-Mulder (CRM14): Oorkonde E715r38201

@ Alle den ghenen die desen brief sellen sien of horen lesen doe ic verstaen gheriit van + den vlyete knape @ dat ic vercoft hebbe den meystersteren ende tghemene convent van den beghiinhoue tutrecht twe morghen @ lants daer ic + hem den vryen eyghendom of ghegheuen hebbe egghen ende eynden mit al horen toebehoren @ alse gheleghen ziin in minen lande in polsbroec daer matheus claes soen boven naest ghelant is ente heren @ van + den doem tutrecht beneden ende kenne ende lye dat mi die meystersteren van + des hoefs weghen daer of @ voldaen ende betaelt hebben den eersten penninc mitten lesten wilke twe morghen lants voerscreuen ic weder in huurweer ende in pachte ontfanghen hebbe van den meystersteren ende van + den hove voerseyt tot @ twintich iaren toe naest comende na der daten des briefs Elx iaers om vier oude scilde ghoet van goude @ van volre wichte ende van gherechter munte des coninx van vrancriic oft paeyment daer voer dat daer @ ghoet voer is in elker tiit der betalinghe te + betalen vry ende kommerloes te + leueren op horen hove voerseyt den meystersteren de nv ziin of wesen sellen in der tiit alse de een helft tot sinte martiins misse in den @ winter nv naest comende ente ander helft op zinte peters dach ad cathedram daer naest comende of binnen @ viertien daghen na elken termine voerseyt onbegrepen Ende also voert iaerlix dese twintich iaren wt @ vriis ghelts sonder enich ofcortinghe ofte verminringhe des voerseyden pachts Voert zo gheloue ic in goeden trouwen voer mi voer miin erfnamen ende voer miin nacomelinghen den meystersteren tot des hoefs @ behoef voerseyt alse waer dat sake dat hem enighe aensprake lette of commer ghedaen worde an dien @ twe morghen lants voerscreuen dat ic dan of miin erfnamen of miin nacomelinghe den hove voerseyt @ twe morghen anders lants in minen lande bewisen sel ende hem daer den vryen eyghendom of gheven de also ghoet siin ende also vele iaerlix renten moeghen alse dese twe morghen lants voerscreuen @ also dat dien meystersteren ghenoecht Ende om~dat ic wil dat dit vast ende stade bliue ende onverbroken @ zo hebbe ic gheriit van + den vlyete minen seghel an desen brief ghedaen ghegheuen jnt iaer ons heren @ dusent dre + hondert twe ende tachtich des manendaghes na zinte andries dach