Corpus Van Reenen-Mulder (CRM14): Oorkonde F094p38901

WJ Ghert de veer hertwech Cru_mecamp en_ Ernst van redese doen cont allen luden dat tusschen ons en_ onsen erfg_ eene rechte wessele van weghen in allen manieren alse hijr na uolghet erflike te duyren ghededingt js also dat wi hertwech en_ Ernst voerscr_ ouergheuen Gherde dien veer dien wech dien ons die dijcgraue en_ heemraet van Mastebroke mit rechte tho ghescickt hadden daer hem Ghert de veer eenen andern wech weder in wessel vor ghegheuen heuet alse dien wech vors_ te hebben ouer ziene oelthoveghe maet gheheten boechorst en_ gheleghe_ tendes Ernsts vorscr_ lande En_ de wech vors_ sal ghaen langhes de maet vors_ an die eene zijt / ont an dien dyck en_ daer bi js ludeken spersoert naest ghelandet voert soe beken jc Ernst van redese voers_ dat hartwech cru_mecamp en_ Ghert de veer eenen wech roden breet ouer mijn lant tusschen hem beyden gheleghen hebbe_ soelen ont an dien wech gherds vors_ te verstaen roden breet bynnen graues / vort sin vorworde dat wi drie ghelike alse onser elc een derdendel dien wech afgrauen soelen van + der oelthoueghen maet voerscr_ also dat de wech vorscr_ roden breet bliue bynnen graues En_ dien wech voerscr_ Mach ghert de veer oft ziene erfg_ op de eene zijt tot ziere maet wert bepoten en_ die ander zijt moghen hertwech en_ Ernst vorscr_ oft oere erfg_ bepoten ofts hem ghenoghet vort sin vorworde waert sake dat die erfg_ van mastebroke oft anders iemant Gherde dien veer vorscr_ oft zienen erfg_ zien wech vorscr_ mit rechte afwonne die hartoghe @ en_ Ernst vorscr_ van + den dijcgrauen en_ heemrade vors_ tho gescicket js soe were dese wessele en_ vorworde quijt en_ malc solde comen op dat zien alse hi dat vor desser wessele en_ vorworde vorscr_ ghehat hadde En_ wat poten daer dan oppe stonden die solden dien ghonen bliuen dien de weghe bleuen en_ weder an~quamen alse si oft oere erfg_ de van~oelds ghehat hadden oft an eruen mochten Al arghelist vytgheseghet jn kennisse dier waerheyt soe heb wi Gert hartwech en_ Ernst voerscr_ onse seghele vor ons en_ onse erfg_ an desen brief ghehanghen Geg_ jnt jaer ons h_en dusent drie + hondert neghen en_ tachtentich dies donredaeghs nae sante Margreten dach