Corpus Van Reenen-Mulder (CRM14): Oorkonde F095p38601

JC willem . van . zinderen . in diir tiit . Richter te zallic doe te + uerstaen . allen . den . ghenen . die desen . brief . soelen . siin of hoeren . lesen en_ tughe mit desen . teghenwoerdighen . brieue . dat vor my en_ vor gherichtes~lude . die hiir nae bescreue_ staen . jnt gherichte en_ in ene_ gheheghenden . heymale sin ghecomen . herberen van . putten . en_ berte siin echte . wittelike . wijf . mit herberen . vors_ hoeren ghecoren . mo_bar dien si aldaer koes mit handen en_ mit monde en_ hoer ghegheue_ waert alse ordel en_ rechte wysede en_ becande_ al~daer ijrst . vor hem . en_ vor oere erfg_ . dat sie eenpaerlic mit hoere_ g˚eden berade en_ mit moetwillen rechtlike en_ redelike erfliken . en_ ewelike_ te + besitten vor een edel eyghen guet in ene_ rechte_ steden . erfcoepe vercoeft hebben . johan van zanten of sinen . erfg_ . ellef merghen . landes twe . hont landes en_ vijf + en_ + twijntich . roden die nv heymeric johans soen en_ lubbert die zubber in pacht hebben . en_ gheheiten siin herberens~slach ouer die weteringe en_ die gheleghen siin in zallant in zalliker kerspel ouer die weteringe ter veluer ziit wert aen . daer boue_~aen neest ghelant is lubbert die zubber en_ benede_ diric van rute_berch . en_ mit den ene_ strecket up iohan van . Bochorst / en_ mit den anderen up die weteringe mit torue mit twighe mit weyde mit water mit weghe mit velde mit aller slachter n˚t en_ thoebehoringe als dat vors_ lant en_ g˚et ghelegen is omme een su_me gheldes die herberen en_ berte_ vors_ witlic en_ wael betaelt is van . ioha_ van . zanten vors_ als sie vor my becanden . in den . selue_ gherichte Ende droghen . hem . die ellef merge_ twe hont en_ vijf + en_ + twijntich rod_ landes vors_ up vor my en_ ghinghe_s vyt en_ verteghen daer van als ordel en_ recht wysede en_ erfcoeps recht is en_ loeueden hem des te waren vor een edel eyghen guet vor al die ghene die des tho rechte come_ willen . woe sie hem des tho rechte waren . soelen . hiir hebben . ouer en_ aen . ghewesen als kornoten en_ gherichtes~lude johan van bochorst willem . van bochorst br˚en gheerloch soen euert hermans soen . wemer h_mans soen lubber die zubber sander iohans soen en_ a_ders veel gueder lude tuge die hiir tho gheropen en_ gheboden warden al arghelist vytgheseghet jn orkonde des briefs beseghelt mit myne_ segel willems richter vors_ . om beden . willen . herberens en_ berten . vors_ en_ ic herbert vors_ hebbe myne_ segel vor mi en_ vor berten mijn wijf vors_ en_ vor onse erfg_ aen desen brief ghehang_ om een meerre vestenisse aller dinghe vors_ en_ hebbe ghebede_ pelgherim va_ putten . myne_ broder dat hii desen brief om my_re beden . wil mede besegelt heft om eenre meerre be_nynghe der waerheit aller dinghe vors_ en_ ic pelgherim vors_ hebbe mijn segel mede aen desen brief ghehanghe_ om herberts vors_ mijns broder bede wil . om een meerre be_nynghe der waerheit aller dinghe vors_ Gegeue_ jnt iaer ons h_en dusent drie + hondert . + tachtentich en_ ses up ons lieue_ h_en hemeluaerdes auont