Corpus Van Reenen-Mulder (CRM14): Oorkonde F095p39702

Ic bertolt van necke in + der tiit schulte in + den kerspel van sallic doe kont allen luden jn desen openen brieue dat voer mi ghecomen siin daer ic sat to gherichte in enen ghehegheden heymaele Claes spaen ende wendelmoet siin wittelike echte wiif mit oeren ghecoerne_ momber . alse mit claes vorscr_ die hoer al~daer gegeue_ waert als ordel ende recht wisede . bate siin dochter mit Aernt ouerhof oere_ momber bele abe trude . claes kinder die hi bi~comen hadde . mit claes vorscr_ oeren vader ende momber die hem al~daer gegeue_ worden als ordel ende recht wisede . ende bekanden voer mi in + de_ seluen gherichte dat si voer hem ende voer hoere erfg_ mit gueden berade en_ mit vrien moetwillen rechtelike ende redenliken erfliken ende ewelike_ to besitten voer een edel eyghen in enen rechte_ steden erfcoep . vercoft hebben . harman spaen ende sinen erfg_ Ander + haluen morghen landes gheleghen in roedinc~maeden daer an die ene zide naest ghelandet is johan van buchorst ende an die ander zide Aernt blanckert streckende van + den caproen in die swinghe ist myn ist meer alst daer gheleghen is mit al sinen tobehoeren mit da_me mit torue mit twighe mit water mit weyde mit weghe mit velde mit alre slachter n˚t ende mit al sinen tobehoere_ alst gheleghen is in + den kerspel vorscr_ ende in + den gherichte van buchorst Om een su_me gheldes die hem harman vorscr_ wittelike ende wal betaelt heuet als claes wendelmoet bate Aernt bele Aue trude vorscr_ voer mi bekanden in + den seluen gherichte Ende droeghen harman vorscr_ en_ sine_ erfg_ dit vorscr_ lant voer mi op ende ghenghen daer wt ende verteghen daer van als ordel en_ recht wisede Ende loueden harman vorscr_ ende sinen erfg_ dit vorscr_ lant te waren voer een edel eyghen ende allen voercommer af te doen woe si hem dies to lantrechte mit rechte schuldich siin te waren . voert is voer mi ghecomen in den seluen gherichte dirc ouerhof als een momber van belien fien mechtelden claes vorscr_ echte kinder . die hi bi ghebben siinre dochter hadde . Ende heuet harman spaen vorscr_ ende sinen erfg_ dit vorscr_ lant opgehedraghen ende daer van verteghen als ordel ende recht wysede . als een momber van onmondeghen kinderen mit rechte schuldich is te doene . voert soe hebben voer mi bekant dirc ouerhof ende Aernt ouerhof ende rolof ou_hof dat si wittelic ende wal ghescheyden siin . van claes spaen vorscr_ als van alzulken guede ende erfnisse als belien fien ende mechtelden die claes vorscr_ bi ghebben hadde an~ghestoruen is van ghebben vorscr_ oerre moeder . daer heeft hem claes vorscr_ voer bewiset ende ghegheuen vier morghen landes ist myn ist meer als die gheleghen siin opten hoembroec ende op roterts~camp Ende hier mede hebbe_ dirc Aernt ende rolof vorscr_ Claes vorscr_ quiit ghescolden van alzulker erfnisse ende guede als den kinderen an~ghestoruen was van oerre doeder moeder . voert soe hebben dirc Aernt ende rolof vorscr_ harman vorscr_ ende sinen erfg_ dit vorscr_ lant ghelouet te waren te eweghen daghen . voer alle aensprake die hem comen mocht van belien fien ende mechtelden vorscr_ en_ oere_ erfg_ Ende belie fie ende mechtelt vorscr_ hebben harman vorscr_ ende sinen erfg_ dit vorscr_ lant op~ghedraghen als si schuldich waren to doene hier waren ouer en_ An alse koernoete_ ende gherichtes~lude Euert harmans soen albert harmans soen sander ians soen ende anders veel gueder lude tughe die hier mede to gheropen ende ghebeden worden al arghelist wt~gheseget Jn orconde der waerheit soe hebbic bertolt schulte vorscr_ miin seghel aen desen brief ghehanghen om beden willen van claes ende wendelmoet siin echte wiif . ende claes kinder ende dirc Aernt ende rolofs vorscr_ Ende omme der meerre vestenissen willen soe hebbic claes vorscr_ voer mi voer wendelmoet miin echte wiif vorscr_ ende voer myne kinder ende voer onse erfg_ miin seghel mede aen desen brief ghehanghen om~dat alle punte_ vorscr_ stede en_ vast zoelen bliuen en_ onverbroeke_ Geg_ int iaer ons heren dusent drie + hondert soeven en_ neghentich opte_ neghende_ dach in april