Corpus Van Reenen-Mulder (CRM14): Oorkonde F096p35002

Jc willam die bleke Richter tho zwolle doe condich en_ Oerconde openbare dat voer mj quame_ Johan die smjt en_ aleid siin wijf en_ ghaven daer mit Ordel en_ mit rechte tho rechten testame_te twe pont clens ghelds iaerlixs wt iohans were iohans soen ludekens soen gheleghen bi + den kerchove opper h˚ernen tuschen der strate_ en_ suzebaukes were dien here_ van Regulere_ van bethlehem to zwolle erflike en_ ewelike die helft tho betaelne tho paeschen en_ die andere helft tho zantganggen ont ter tijd dat oer erfname_ voers_ dien here_ voers_ gheven viertich pond clens ghelds payments als dan ghengh en_ gheve is / en_ dat voerghenomede gheld solen die voerghenomede h_en weder byleggen an rente / en_ die solen die here_ iaerlixs obbore_ / en_ daer solen si oer memorien iaerlixs van doen / sonder alrehande arghelist / hier ware_ over en_ an lubbert coteken / henric van mechchele / en_ anders veel goeder lude Jn Orcu_de des briefs byzeghelt mit mine_ zeghel willams richters voerghenoemt vm bede + willen Johans en_ aleyde voerghenoemt Ghegheue_ Jnt iaer ons h_en / dusent / + drie + hondert en_ vieftich op sante vitus dach eens martelers . -