Corpus Van Reenen-Mulder (CRM14): Oorkonde F096p35004

Jc willem die bleke Doe Condich en_ orconde openbare dat ic hebbe ghegheuen en_ gheue in dessen brieue den h_en van + den regulieren tsuolle drie + hondert pond gueds ghelds alse nu die vrederic van hekeren en_ ludgaerd ziin echte wiif Juncurouwe van Rechten schuldich sin en_ ghebuet hebt te + bitaelne alse die brief spreket die daer op ghegheuen is weliken brief ic em hebbe ghegheuen dat sie moghen manen mit den vors_ brieue ghelike dien oft ickt zeluen waere / Jn alsulken vorwarden dat sie mit dien vors_ drien + hondert ponden copen solen Renthe to enen altaere in (onleesbaar) kerken die Renthe vors_ enen preester te + gheuene die daer daghelix misse voer doe op dien vors_ altaere erflike en_ ewelike / sunder arghelist hiir waern ouer en_ an her hessel cureet der kerken van suolle her johan die visscher preestere lambert van honhorst en_ coep van baerlo scepene tsuolle Robert van creyenscote en_ anders vele gueder lude Jn orconde des briefs biseghelt mit minen seghele willems vors_ / Ghegheuen Jnt iaer ons h_en dusent drie + hondert viiftich des vriedaghes na s_te Jacobe