Corpus Van Reenen-Mulder (CRM14): Oorkonde F096p36101

IC Engbert van versen jn dier tijt Richter tot zvolle Make kundich allen luden ende orconde openbaer dat voer mj quam ende voer gherichts~lude hier na bescreue_ int + ghericht ende in ene_ ghehegheden hemael Rolof die baerscheerre zeluer Ende liede dat hij vercoft hadde erflijc ewelijc ende o_mermeer voer hem ende voer zine recht erfghen_ alsoe verre als jutte ziin echte wijf ende hij beide bleue_ doet op den woch to zunte jacob daer zij op ghewandert ziin . Gryete_ ghysebers wijf des ghulde_ ? god die ziel af hebbe ziin deel van der were die gheleghen is by der hoghen brughen tussche_ der strate_ ende Roloues weer des huishere_ om hondert goider ghuldenre brucscher schilde gherecht van ghewicht of ghelijc payment daer voer . die zij of hoer erfghen_ vten ende betalen zoelen bynne_ jaers in vorwaerden als hier na bescreven steet na dien daghe dat zij voer waer eyschen van goode_ warachtighen lude_ dat Rolof ende jutte voers_ beide doet ziin Ende liet hoer die voers_ were voer mj op in den zelue_ hemael mit ordeel ende mit recht zonder arghelist . jn dusdane_ vorwaerden dat zij des voers_ gheldes betalen zal zunte Mychiels Raetluden tve pond groet daer zij jaerlix tvewerue zine memorij om doen zoelen ende oer kercken bestaen in alle_ manire_ als men h_en Conraide memorij dõet voert tot becleem een pond groet daer zij elkes jaer vierwerue zine memorij mede doen zoelen voert den heylighe_~gheest een pond groet daer die priester daghelix in zijnre missen zijnre om ghodencken zal . voert den baghine_ een pond groet daer zij daghelix om voer hem bidden zoelen . voert den vier altaere_ een pond groet daer zij een pond des jaers mede cope_ erflijc . en_ doe heb elc Altaer vijf schillinge des jaers om die priester voer hem bidden . . Voert zoe zal + me_ o_mer mit elken pond zoe wient ghegeue_ is erflijc een pond des jaers cope_ dat die memo_i erfliken die vaster bliue . voert zoe zal Roloues broeder voers_ hebben drie pond groet mer daer zal hij drie pond des jaers af hebben also langhe thent den vrienden duncket dat hem dat ghelt nvtter is da_ jaerghulde en_ zoe zal me_ die drie + pond groet voers_ vten mer storue Roloues broeder voers_ zonder ? zoe zolden zu_te Mychiels Raetlude die drie + pond groet hebben en_ cope_ daer drie pond des jaers mede . daer zij oec zine memori to drien tiden mede doen zolden als voers_ is . . voert zoe zolde ment Roloues vit~vaert doen mit ene_ pond groet ende wes daer over liept dat zolde men ? lude_ gheue_ / Mer weert dat jutte te huis q_me ende god zine_ wille by Roloue voers_ dede zoe mocht jutte die weer erflic beholde_ en_ dat ghelt betalen by hoere_ lyue / mer en dede zij des niet . wa_neer zij doet weer zoe zolden zunte Mychiels Raetlude die dan were_ Rolof deel van dier voers_ weer vercope_ ende vten daer af die souen pond groet testaments voers_ ende dat daer over~bleue dat zolde Roloues broeder voers_ of zine echte kijnder hebben / Mer storue Roloues broeder voers_ of ziin echte kijnder eer jutte voers_ zoe zolden zunte Mychiels Raetlude hebben zoe wes daer liep over die zoven pond groet voers_ ende daer zolden zij mit elken pond groet een pond des jaers copen erflijc ende alsoe me_nich pond des jaers als zij dan costen of hedden van Roloues goide voers_ also me_nichwerue zolden zij zine memori doen des jaers als voers_ is / Ende liet dit voers_ testame_te en_ maki_ghe voer mj op in den zelue_ hemael mit ordeel en_ mit recht zonder arghelist / beholdelic jutte_ voers_ ende hem hoere ghiftinghe die zij male den and_en tot hoere_ lyue voer ghegheue_ hebben al hoere macht al arghelist vitgheseghet . hier were_ over ende aen . Johan stijnt Oelric wolberts zoen johan zelle herman gry_me bernd rebbeken johan van den Campe Ghosen die coster ende anders goide lude . . jn Orconde des brieues beseghelt mit mine_ zeghel jn den jaer ons h_en dusent drie + hondert Tsestich + ende + een Op zu_te Maximijns dach