Corpus Van Reenen-Mulder (CRM14): Oorkonde F096p36401

Wy Scepen ende Raet der Stat van zwolle . Maken kundich Allen luden . Dat voer ons quam in + scependom als voer scepen . Egbert lutghaerde zoen zeluer ende makede bij rade / consent / volboert ende hande zijnre erfghename / als henric ruuschen . lutghaerde Seyne_ wijf wolberts zoen . Beerten van buessen / ende . bette ghosens in rechten testamente ende in aelmosen in vorwaerden als hijr na bescreue_ staen . Jn Den yrsten zoe ghaf hij Henric symans zoens twe kijnder die hij bij . Lubben hadde . Twe + hondert ghoider brucscher schilde vier + en_ + twijntich vleemsche groet voer den schilt to volste tot oere_ berade te vyten elkes aendeel bi_nen jaer ende bi_nen daghe na dien dat elc beraden is . Jn desen manire_ dat dat ene kijnt op dat ander erven zal . mer storue dat leste zonder boerte zoe zolde dat voerscreue_ ghelt weder comen op Egberts erfghen_ voers_ . Voert zoe ghaf hij Ellen cremer Arndes wijf en_ oere_ kijnderen vyt oere were gheleghe_ in zassincstraet bij den wijnkelre erflijc drie pond ende vijftien schillinghe des jaers . Voert zoe ghaf hij in den vier Altare_ in der groter kercken elken des jaers Tyen schillinge / ende dese Twe pond des jaers zal men boeren jaerlix by cremer Arndes were voers_ mer daer voer zoelen die erfghename bi_nen jaers bute_ zwolle bewisen erflijc Twe pond des jaers vyt ghoide dat daer ghoit ghenoech voer is / mer wilcoer altaer dat men jaerlix niet en besonghe daer zolden zunte Mychiels Raetlude die Rente af boere_ / ende leighen zij in zunte Mychiels orbaer . Voert zoe ghaf hij erflijc Acht pond des jaers vyt zinen deel van den vijf Merghen landes gheleghen in den Weddeloep die zunte Mychiels Raetlude jaerlix zoelen boeren ende aldus deylen . Jn den yrsten zoelen die Raetlude jaerlix boeren tot zunte Mychiels behoef Derde + half pond daer zij jaerlix zine memorij mede doen zoelen als men h_en Conrarts memorij jaerlix te + doen pleghet . en_ dat daer over loept dat zal zunte Mychiel hebben . voert zoelen zij jaerlix gheue_ Armen luden om cleder vierde + half pond en_ om scoen Twe pond . voert ghaf hij vyt barlemans ghoide tot yttersim erflijc des jaers der kercken van Daluessem tyen . . scilli_g Der kercken van der Heyne des jaers Tyen schilling . ende der kercken van Coten des jaers Tyen schillinghe . voert zoe ghaf hij vyt Cru_mecamp erflijc den baghine_ va_ zwolle des jaers een half e_mer boteren / ende den heylighen~gheest des jaers een half e_mer boteren . voert zoe ghaven Egbert voers_ ende . . beerten ziin echte wijf . tot dien Tween + hondert ponden dier her Vrederic van Rechter noch hondert pond sculdich is . ende henric die roever oec af schuldich is hondert pond die hij alrede gheboert heuet van oere beider ghoide wa_neer oere een steruet Twe + hondert pond / ende die zal men leighen in een Altaer daert Seynen Wolberts zoen johan Wermers zoen . Dyric cele ende Aleph meys duchte dat zij beste bestadet weren . voert zoe ghaf hij bruchtes wyue tot oere lyue des jaers een pond / voert zoe ghaf hij . . beerten zine_ wyue tot oere_ lyue te bruken dat huis op der nyer deser~straet daer zij nv in woene_ / ende dat beste bedde mit eenre Deken en_ mit tween paer slaeplake_ als men dat op ziin scoenste te + maken pleghet . voert zoe ghaf hij van der hand den h_en van bethleem vijf pond . Den mijnrebroderen twe pond . Den jacopine_ twe pond . Den broderen van asperen . een pond . den brodere_ van den beylaer . een pond . Joha_nes celen vijf pond . johan celen kijnder te volste tot oere_ berade acht pond . Ende dit voers_ testament loveden dese voers_ erfghen_ te vyten in allen maniren als voers_ is bi_nen jaer en_ Daghe na dien Daghe dat god en_ die heylighe kercke zine_ wille mit Egberte voers_ ghedaen heuet . ten weer dat Egbert voers_ enich pu_te van testame_te voers_ weder~zeghede voer Twe Scepen of voer meer / ende wes hij wederseghede voer Scepen des en dorsten ziin erfghename niet vyte_ na zijnre doet . Jn Orconde des briefs zoe is onser Stat zeghel voers_ om bede wil van beiden siden ghehanghen aen desen brief . Jn Den Jaer ons h_en Dusent Drie + hondert Tsestich + en_ + viere op zunte Aghaten Dach