Corpus Van Reenen-Mulder (CRM14): Oorkonde F096p36402

Jc henric van Nyensteden in der tijt Richter tot zwolle Make kundich Allen luden Dat voer mj quame_ en_ voer gherichts~lude hier na bescreuen int + ghericht ende in enen ghehegheden hemael . herman oelrix zoen Mechtelt ziin echte wijf jacob van den tyver ende foyse ziin echte wijf . ende lieden dat zij vercoft hebben erflijc ewelijc ende o_mermeer mit ghesamender hand . voer hem en_ voer oer recht erfghen_ om een su_me gheldes die hem vol ende al betaelt is . Ghosen ludekens zoen van wilsem . Ghosen hyrt / jacob ryet / ende Rolove van wilsem ende oere_ rechten erfghename_ . Drye pond ende Twalef schillinghe des jaers vyt Robert crusekedels were / ende vier pond ende Acht schillinghe des Jaers vyt Roderix were t_ linthorst . wulke voers_ weren gheleghen ziin tusschen des heylighen gheest straet ende ludekens were des scutten . voert zoe lieden jacob ende foyse voers_ dat zij zonderlinghe vercoft hebben als voers_ is . Ghosen . Ghosen . Jacob en_ Rolove voers_ en_ oeren rechten erfghenamen in voerst~straet vyt Tyde hermans zoens were gheleghen tusschen den dutter en_ heyne ty_merma_ne een pond des jaers / voert vyt Ghesen were des vriesen gheleghen tusschen Elle pueps ende eenre were gheheyten phane kijndes were een pond des jaers voert vyt Rutgher na_ne_ mans were gheleghen tusschen voets steghe en_ Dyric moys een pond des jaers / voert vyt Arndes were des lutticken gheleghen bij voerst_~poert teindes wolberts des smedes were een pond des jaers / wulke voers_ jaerghulde men jaerlix betalen zal die ene helfte tot zantghanghe / ende die ander helfte tot paesschen tot hueren~recht mit paymente daer men pacht ende huere binnen zwolle mede betaelt / ende lieten hem dese voers_ jaerghulde voer mj op en_ verteghen daer van in den zelue_ hemael mit ordeel en_ mit recht zonder arghelist hier weren over ende aen . Seyne wolberts zoen Oelryc wolberts zoen . Everd va_ coten henric claes zoen ende anders ghoide lude . Jn orconde des briefs beseghelt mit minen zeghel jn den Jaer ons h_en Dusent Drie + hondert Tsestich + en_ + viere des woensdaghes na den zo_nendaghe als men zinghet Misericordia D_m___