Corpus Van Reenen-Mulder (CRM14): Oorkonde F096p36502

Allen luden die desen brief zolen zien of horen lesen . Doe Jc Coep van kreyenscote . Jn der tijt Richt_ tot zwolle . kundich en_ orcu_de ape_bare . Dat voer mi quamen en_ voer cornoten na~ghescreuen Johan van Tyvenca_pe en_ bate ziin echte . wijf . en_ gheliede_ dat zij schuldich waren : erflic en_ ewelic heren dideric van baerlo priester vicarius nu ter tijt eens . altaers ghestichtet jn die kerspel~kerke van zwolle jn ere sante johannes Ewangelisten en_ alle goedes hylighen . of we jn der tijt vicarius is des altaers . vorgh_ . twe pund cleens gheldes . die aelf van Tyvencampe johans broeder voers_ . dien . god ghenedich sij . gaf jn rechten testament jn dat altaer vors_ . bij vrien willen Johans en_ baten vors_ . vyt tien pund gheldes . die zij hebben jaerlix vyt Cysen goed ter schuren . gheleghen to spoelde . En_ lieten heren Dyderike vors_ tot behoef des vors_ altaers vp . die twe pund jaerrenthen vyt den voers_ tien punden voer mi jn ene_ gheheghede_ heymael en_ verteghen dijr als ordel en_ recht wisede . Te betalen alle jare half to passchen . en_ half to zantgangen . to huer~rechte jn vorwarden na~gescreuen . Dat her dyric of we jn der tijt vicarius is . des vors_ altaers alle jaer erflike en_ ewelic doen sal memorie . of jaerghetide aelues ziele voers_ des mane_daghes na sante vitus daghe mit tyen schillingen cleens gheeldes . die half te gheuen den priestere_ die to vigilien en_ to missen sin teghe_wordich en_ to zine graue gaen . en_ die ander helfte te gheuen . om bier . om broet . om ene vigilie_keerse en_ tot offeren to drien missen . alse zedelic en_ woenlic is in der kerspel~kerken tot zwolle . Voert sint vorwarde . dat johan en_ bate vors_ of hoere erfgh_ . die twe pund gheldes jaerrente losen en_ quijt copen moghen des dinxdaghes na passchen of achte daghe daer na . ombegrepen . mit twintich bruggesschen schilden . goed va_ golde . en_ van ghewichte . of mit vier + en_ + twintich vlamesscher of hollandescher groete . voer elken schilt gherakent . welc ghelt men jn erfrente beleggen sal . bij rade johans of baten of hoere erfgh_ . en_ des vicarius jn der tijt des altaers vors_ aelves ziele_ memorie of jaerghetide daer of te doene . als vors_ is . sunder al arghelist . hier were_ ouer en_ an alse . cornoten . Gherd van Tyvenca_pe . Seyne wolberts zoen . johan va_ wijtmen . herma_ va_ ghenne . en_ anders vele goeder lude . Jn orcu_de des brieues die stede en_ vast te bliuen om bede willen van beyden siden bezeghelt mit mine_ zeghele . Coep richters vors_ . En_ om die merre vestenisse Want alle zaken also sin als vors_ is . heb ic johan vors_ miin zeghel mede ghehangen an desen brief tot enen tughe der waerheyt . Daer ic bate onder ghelie . aller vors_ zaken want . zij mit minen . vryen willen ghesceet sin . Ghegheue_ jnt jaer ons heren Dusent Drye + hundert vijf + en_ + tsestich vp sante katerinen . auond ener hyligher Juncfrouwen . - .