Corpus Van Reenen-Mulder (CRM14): Oorkonde F096p36601

JC jacob van creyenscoet in der tijt Richter tot zwolle Make kundich Allen luden Dat voer mj quamen int + ghericht ende in enen ghehegheden hemael herman oelrix soen en_ Mechtelt ziin echte wijf ende lieden dat zij vercoft hebben erflijc ende ewelijc voer hem ende voer oer erfghen_ om een su_me gheldes die hem vol ende al betaelt is Coep riede ende Tyde roeden ende oeren erfghenamen een pond des jaers vyt Tyde hermans zoens were gheleghen in voersterstraet tusschen den dutter ende heine ti_mermanne / ende een pond des jaers in dier zeluer strate_ vyt Ghesen were des vriesen gheleghen tusschen elle pueps ende eenre were gheheite_ Phane kijndes were . voert vyt Rutgher ne_nen mans were in der voers_ straet gheleghen tusschen voetes steghe ende dyrijc moys were een pond des jaers voert vyt Arndes were des lutticken gheleghen bij voerster~poerte teindes Wolberts des smedes were een pond des jaers . wulke voers_ jaerghulde men jaerlix betalen zal die ene helfte tot Zantghanghe / ende die ander helfte tot Paesschen tot hueren~recht mit paymente daer men pacht ende huere bi_nen zwolle mede betaelt . ende lieten hem dese voers_ jaerghulde voer mj op ende verteghen daer van in den zeluen hemael mit ordeel ende mit recht zonder arghelist . hier weren over ende aen alse gherichts~lude Seyne wolberts zoen Alfer van scalcwijc wijchman rvmelijf ende anders ghoide lude . Jn orconde des brieues beseghelt mit minen zeghel . Jn den jaer ons h_en Dusent drie + hondert Tsestich + en_ + sesse op zante Odulphs dach