Corpus Van Reenen-Mulder (CRM14): Oorkonde F096p38401

Wij Johan Essikens zone witte Coep maes zoen en_ wychman kuering doen cond en_ kenlic allen luden dat wij mit gansen berade en_ mit ghemenen consente witlic en_ wal vercoft hebben erflike voer ons en_ onse erfghenamen in enen steden erfcope heren Gheride den groten en_ sinen erfgh_ of den ghenen dien hi dat gheuet of machtich maket mit sinen brieuen Een huys en_ erve mit sinen to~behoren dat gheleghen is in der Stad van zwolle in + der beghinen~strate daer an die ene zijt gheleghen is der mynre~broeder huys van Campen en_ an die ander zijt Clawes die messemaker voer een su_me gheldes die ons die zelue her gherijt witlic en_ wal betaelt heft erflic en_ ewelic te besittene en_ te holdene na der formen en_ manieren daer hijt Jenighen menschen Jnne gheuet of machtich maket also dat wij en_ onse erfgh_ ghenerhande recht noch eijghendoem daer an en beholden wilc huys en_ erve ellic van ons en_ to~gader ghelouet hebben en_ louen voer ons en_ onse erfgh_ den voerscr_ heren gheride of sinen erfgh_ of dien hijt gheuet of machtich maket dat voerscr_ huys en_ erve op te draghene en_ to vestene binnen viertien + daghen na hore maninge na alle der manieren dat recht en_ woente is in + der Stad van zwolle erve en_ huys te vestene en_ op te draghene also dat sie na allen rechte hem vast sin . En_ weer dat wij of onse erfgh_ binnen den viertien + daghen des dan niet en daden so solde wij of onse erfgh_ vervallen wesen van eenre pene van twe hondert older schilden to behoef heren gherides of siner erfgh_ of den hi des machtich maket of gheuet en_ in deen so en sole wij noch onse erfgh_ ons niet moghen beschirmen of bescudden van + der pene en_ vervallene om dat of die scepene daer niet over staen en wolden of dat niet bezeghelen en wolden want wij louen daer voer ons en_ voer onse erfgh_ onder die zelue pene dat wij dat vergaen zullen an die scepene en_ richter sonder heren gherides cost of siner erfgh_ of der ghener dien hijt gheuet of machtich maket dat sie daer over staen zullen alse scepene en_ richter daer wij of onse erfgh_ hem die oplatinge en_ die vertichnisse doen zolen en_ die brieue mit horen zeghelen sole wij p_curieren heren gheride of sinen erfgh_ of den ghenen dien hijt machtich maket of gheuet . En_ weert sake dat heren gheride of sinen erfgh_ of den hi des machtich maket of gheuet Jenich hinder stoet scade ansprake onraste of p_lement of q_me of scede an desen huys of erve voerscr_ van ons of van onser Jenich of van onsen erfgh_ of van + den scepenen of raet van zwolle / alle den hinder scade stoet ansprake solde wij en_ onse erfgh_ hem en_ sinen erfgh_ of den hijs machtich makede of gheue of doen sonder horen scaden en_ oprichten en_ beleggen tot horen simplen zeggen . En_ weert dat sie leden ansprake stoet scade hinder p_lement van ons of van onsen erfgh_ of van + den scepenen en_ sie den groteden voer vier guede lude mit horen brieuen en_ mit horen zeghelen den solden wij en_ onse erfgh_ hem dan betalen binnen enen vierendel Jaers na siner maninge . en dade wij of onse erfgh_ des niet so solde wij vervallen wesen tot heren gherides behoef of siner erfgh_ of den hijs machtich makede of gheue in ene pene van hondert oelden schilden en_ nochtan solde wij den scaden oprichten alse voerscr_ en_ alle vestinge doen alse wij ghelouet hebben . Al arghelist wtgheseghet . hier weren over en_ an her lambert van Randen . Meyster Johannes cele in dier tijt scolemeyster tot zwolle . wilhelmus van vtrecht Johannes brinckering en_ anders guede lude / Jn orcu_de der waerheit hebbe wij Johan / Coep / en_ wijchman voerscr_ onse zeghele an desen brief ghehangen . Ghegheuen Jnt Jaer ons heren Dusent drie hondert Tachtentich en_ vier des dinxedaghes na sante Martiins dach in + den zomer gheheten Translatio .