Corpus Van Reenen-Mulder (CRM14): Oorkonde F096p38601

Wy . . Johan ludikens sone / ende Wermer johans sone / Scepene jn der tijd der Stat van Suolle . Maken k˚ndich allen luden . dat vor ons quemen jn scependoem alse vor scepene / Johan zelle / ende lubbe zijn . echte wijf mid jaha_ne vors_ Oren gecoren mombaer / die oer mid ordele ende mid rechte gegheuen waert / Ende ghelieden dat ze vor vm / ende vor oer erfghenamen / erflijc ende ewelijc vercoft hebben / Om ene su_me gheldes / die vm vul ende al betaelt js / Jutten die ludikens wijf was celikens / ende oren erfnamen erflike to besittene / tve p˚nd ghelds des jaers vyt oere alinger were gheleghen vp den leghem Tusschen h˚ghen were des pelsers / an die ene zijd / Ende Reghenverdes h˚us des vresen / an die ander zijd / streckende tendes achter an des Meyers steghe / to betalene jaerlix die ene helfte to santghangen / ende die ander helfte to paesschen to tins~rechte en_ med paymente daer men meenlijc tins / ende hure . binnen Suolle mede betalen mach / Ende dese vors_ tve pund gheldes . naest drien p˚nden des jaers solen wesen die eerste tins ende pacht die vyt deser vors_ were ghaet / Ende ze lethen oer dese vorscreuene jaer~renthe / daer vor ons vp / jn den seluen scependome en_ verteghen daer van med Ordele / ende mid rechte / ende loueden oer die to warene vor al die ghene die des to rechte comen willen / al Arghelijst hijr jn vyt~gheseghet / Jn Ork˚nde des briefs beseghelt mid onsen seghelen / Johans ende Wermers scepene vors_ / Om bede willen johans zellen / ende lubben zijns wijues vorscr_ Gegheuen jnt jaer . vns heren . . Dusent / + dre + h˚ndert . + Ses ende Tachtentich / des saterdaghes . na sunte lucien eenre hilegher j˚ncvrouwen .