Corpus Van Reenen-Mulder (CRM14): Oorkonde F096p39202

Ic Johan van den tyver henrix soen jn der tijt Richter tot Zwolle make kondich Allen luden / dat voer mj gecomen is in dat gericht en_ in enen gehegeden hemale / henric van haersolt . Ende lieden des dat hij voer hem en_ voer siin erfg_ erflic vercoft heeft om een su_me gheldes die hem vol en_ al betaelt is . Eersamen luden Scepen en_ Raet der Stad van zwolle tot behoef oere stad . die vijf pond des jaers die hij erflic hadde uyt vijf hond landes gelegen bij der yselen in oere tijchelrien . En_ hij liet hem die voer mj op en_ verteech daer van als recht was en_ louede hem die te + waren als een lantrecht is voer hem en_ voer siin erfg_ en_ voer al die ghene die des toe rechte willen come_ Al argelist hijr in vytgeseget . hijr weren over en_ aen als gherichts~lude Rolof van Ittersim . Ghodert van oestenwolde herman van haersolt en_ anders go˚ede lude Jn orconde des briefs besegelt mit minen segel Johans Richters voers_ . daer ic henric van haersolt voers_ minen segel mede heb an gehanghen voer mj en_ voer mijn erfg_ deser voers_ vorwaerden tot enen tuge der waerheyt Gegeue_ Jnt Jaer ons heren dusent drie + hondert Negentich + en_ + twe des vrydages na zante Paulus dach co_uers__ .