Corpus Van Reenen-Mulder (CRM14): Oorkonde F133p35501

Allen luden die desen brief soellen sien of hore_ lesen wy Johan van arnhem en_ herbert van reckhem Scepen der Stad van deue_ter maken Cond en_ tughen openbare dat voer ons in Scependoem seluer quame_ heyne rense en_ beela sijn Echte wijf en_ hebben mit oere_ goeden byraet vercoft en_ opgedraghe_ in enen rechte_ erfcope aernde scheeuinc en_ sine_ rechten erfname_ Een pond gheldes iaerlix renthe_ cleynre pe_ninghe an ghelde als me_ tyns en_ hure in deue_ter mede mach betalen vt den huesen en_ Eruen die gheleghe_ sin bynne_ deue_ter . achter Johans h˚eze van hatthem an die Ene zijt gheleghe_ hues en_ erue albertes des backers an die ander zijt gheleghe_ hues En_ Erue Johans hokesberghes Erfliken ende Iu_mermere to besitten en_ to bruken voer Ene_ Su_ma gheldes die hem van aernde vors_ ? ? en_ betalet is die Ene helfte to betalen op paesschen die ander helfte op sente victors misse (onleesbaar) is zantghanghe_ also als me_ tyns en_ hure in deue_ter pleghet to betalen beholden nochtan elkermalke alle sijns rechts Jn orkunde deses briefs beseghelt mit onsen seghelen ghegheue_ Jnt Jaer ons heren dusent drie + hondert vijf en_ vijftich des maendaghes na onser vrouwen daghe als me_ scriuet assumptio