Corpus Van Reenen-Mulder (CRM14): Oorkonde F133p39004

Wy peter dirx soene richter . Jacob van apeldore_ ende hadema_ van heten Scepe_ in der stad van deuenter tughen apenbare dat vor ons int gherichte in ene_ ghehegheden heymale ende in scependoem ghecome_ sin clawes poetma_ elsabee siin echte wijf ende la_me deer vors_ elsaben witlike suster myt deen voers_ clawese hoerre twyer mo_baer / deen sie beyde aldaer koeren myt handen ende myt mu_den ende hem ghegheue_ waert alse ordel ende recht wysede / ende becanden aldaer voer hem ende voer hoer erfghename_ / dat sie eenparlic myt hore_ vryen ende goeden willen / ende mit hore_ ganssen berade witlic ende wal hebben vercoft in ene_ gherechten ende steden erfcope / aleyde die wilneer echte wijf was arents papen al alsolike erfnisse ende huysinghen / al alsolic cleynoet inghedoempte ende reeschap al siluer ende golt gheslaghen ende ongheslaghen al zaet en_ borninghe / ende aldaer toe al ding ende haue roerende ende onroerende leuendich en_ doet ende in anders enygherhande zaken dattet gheleghen is gheenrehande ding ende goet vytgheseghet / alse so wes dat die vors_ arent pape achterghelate_ heuet . ende des bij dode des vors_ arents vp die vors_ elsabeen ende la_men hoer zuster gheeruet ende ghecome_ is erfliken ende eweliken bij der vors_ aleyde te hebbe_ / ende te besitten / alse voer ene su_me gheldes die hem bij deer vors_ aleyde witliken ende wal is betaelt Ende doe dat gheschiet was / do verteghe_ aldaer rechtevoert die vors_ clawes elsabee siin wijf ende la_me hoer zuster erfliken ende eweliken van al der vors_ erfnisse . huysinghe . goede . dinghe . ende haue_ roerende ende onroerende alse dat voers_ is / ende hebben dat vpghedraghen deer voers_ aleyde ende hore_ erfghename_ erfliken ende eweliken alse in der stad van deuenter ghewoentlic is / also dat die vors_ clawes elsabe ende la_me ende hoer erfghename_ . daer an nyet behoelden en hebben / noch daer an voertmeer nyet te wachten en sin / ende nu_mer daer vp te spreken en hebben in gheenre wijs Mit vorwarden dat die vors_ aleyt betalen sal ende vyten van horen goede al alsolike scult alse arent ende sie sculdich weren in deer tijt doe die vors_ arent afliuich waert ende alsolic ghelt goet ende ding / alse die selue arent voer siinre doet in die ere goedes ghewiiset hadde voer siine ende siinre oelder ziele / ende daer hij beuelinghe af ghedaen hadde gheride van rysen ende herma_ blawen . behoeldelic in dessen vors_ dinghen elkermalke siins rechts / al arghelist hiir vytghesproeken . Jn orconde des so hebben wy onse seghele an desen brief ghehanghen . ghegheuen int iaer ons h_en dusent drie + hondert ende neghentich des donredaghes na sente remigius daghe .