Corpus Van Reenen-Mulder (CRM14): Oorkonde F133p39101

Wij . Gelijs van aernhem / ende henrich luden soene Scepe_ in der stad van deuent_ tughen apenbare dat voer ons in scependoem ghecomen is . henrich scheving / en_ becande dat hij mit sinen vryen willen ghehuert heuet tot enen erftynse . van Bruen calueswinckel en_ webelen sinen echten wyue / die helfte van den erue en_ huys voer en_ achter dat gheleghen is in der stad van deuent_ / in der bisscops~straten bij den brinke tussche_ den erue ende den huys / dat toe~behoert . Gherijt gelijs soene / an die ene ziit / ende tusschen ene_ anderen erue en_ huys / dat dien vors_ bruen / en_ webelen sinen wyue toe~behoert an die ander ziit / iaerlix voer eluen punt gheldes cleenre pe_ninge iaerliker renthen / payments daer men in der stad van deuent_ ghemeenliken tyns ende huyshure mede betalen mach / ende voer een menghelen wiins iaerlik_ renthen . en_ iaerlix die eluen punt vors_ te gheue_ en_ te betalen / die ene helfte daer af to zantgangen ende die ander helfte daer af toe Paesschen / alse men ghemeenlic in der stad van deuent_ tyns en_ huyshuer plecht te gheuen ende te betalen / ende dat menghelen wiins iaerlix te betalen vp den hilighen kerstes auont . . hiir is inne te verstane dat he_rich scheving vors_ / ende zine nacomelinghe besitters des vors_ erues en_ huyses iaerlix betalen soelen die vors_ eluen punt / en_ een menghelen wiins iaerlik_ renthen vyten vors_ alinghen erue ende huys voer en_ acht_ / mit vorwarden dat die vors_ henrich / ende zine nacomelinghe besitters des vors_ erues ende huyses / dat vinst_ dat opt eende van der stallingen staet in der weech / ende luchtet achter / in des vors_ bruens huysinghe vors_ en soelen sie nyet vorder bety_meren / ende die lucht nyet beneme_ ende sie zoelent laten alse wijt . alst nv ter tijt is / beholdelic in den vors_ dinghen elkermalc siins rechtes . al arghelist hiir vytghespraken . Jn orconde des so hebben wij onse seghele aen desen brief ghehangen Ghegheuen int iaer ons h_en dusent drie + hondert een ende neghentich des donredaghes vp sente vitus dagh