Corpus Van Reenen-Mulder (CRM14): Oorkonde F133p39204

Wy Roelf t_ brugghe_ ende Martiin ten bome Scepe_ in der Stat van deuent_ tughe_ openbare dat voer ons in scependoem ghecome_ sin henric bouma_ die Jonghe ende . ghertruet siin echte wiif mit dien vors_ henric hore_ ma_ alse hore_ rechte_ momber ende becanden dat sie mit hore_ gueden willen erfliken vercoft hebben helenb_ghe michels . twe punt gheldes cleenre pe_ninghe iaerliker renthen / payments daer men in der tijt ghemeenliken in der stat van deuent_ tyns en_ hueshuer mede betalen mach / alse vyt horen erue ende hues voer ende acht_ daer sie nv inne woene_ dat gheleghe_ is in der stat van deuent_ in der noerdenberghestraten streckende mit den achtersten eende . vp der stat~mure dat gheleghen is tusschen den erue ende den hues dat toe~behoert gheride van randen an die ene ziit / ende tusschen den erue en_ den hues dat toe~behoert coenrade ten dune / an die ander ziit / iaerlix te heffen ende te boeren / die ene helfte daer af toe paesschen ende die ander helfte daer af to zantghangen alse men ghemeenliken in der stat van deuenter tyns ende hueshuer plecht te heffen en_ te boeren / alse voer ene su_me ghelts die hem wal is betaelt . hiir is inne te verstane dat die vors_ twe punt ghelts iaerliker renthen hadden toe~behoert henrike bouma_ des vors_ henrix vader / die nv dien vors_ henrike sine_ soene in erfscheidingen an~ghecome_ we_en / ende daer en~teendes behoeldelic vyten vors_ erue en_ hues heyniken thoemmaker drie punt gheldes cleenre pe_ninghe iaerliker renthen die volghen solen naest dien vors_ tween punden / en_ voert in den vors_ dingen anders elckermalcke siins rechts beholden al arghelist hiir vyt~ghesproke_ Jn orconde des so hebben wy onse seghele an desen breef ghehange_ ghegeue_ int iaer ons h_en dusent drie hondert twe en_ negentich vp sente lucien auont