Corpus Van Reenen-Mulder (CRM14): Oorkonde F133p39301

Wy Peter van lyenden ende Martiin ten bome scepe_ in der stat va_ deue_t__ tughe_ openbare dat voer ons in scependoem gecome_ sin . ludeken loedeluinc en_ Jutte siin echte wiif / Mit dien vors_ ludeken hore_ ma_ alse hore_ rechte_ mo_ber en_ beca_de_ dat sie mit hore_ gueden willen / erfliken en_ eweliken hebbe_ vercoft . ioha_ne va_ batma_ . vier pu_t gheldes cleynre pe_ninghe iaerliker renthe_ payme_tes daer me_ in der tijt ghemeenlic in der stat va_ deue_t__ tyns ende hueshuer mede betale_ mach alse vyten erue ende hues voer ende achter dat gheleghen is in der stat van deuenter in der berchstrate_ / tusschen den erue en_ hues . lamberts loessing / an die ene ziit / ende tusschen den erue ende hues / iohans die dozemaker an die ander ziit / Ende iaerlix daer vyt te heffe_ ende te boere_ die ene helfte daer af toe Paesschen / ende die ander helfte daer af to zantghanghen alse me_ ghemeenlic in der stat van deuenter tyns ende hueshuer plecht te heffen en_ te boere_ / alse voer ene su_me ghelts die hem bij dien vors_ iohan wal is betaelt . behoeldelic vyten vors_ erue ende hues aleyden wilneer henrix wiif philipps . vier punt gheldes cleenre pe_ninghe iaerliker renthen ende voert in den vors_ dinghen anders elkermalcke siins rechts beholden al arghelist hiir vytghesproken Jn orconde des so hebben wy onse seghele an dessen breef ghehangen ghegheue_ int iaer ons here_ dusent drie hondert drie ende neghentich des manendaghes na sente pauwels dach conuersio .