Corpus Van Reenen-Mulder (CRM14): Oorkonde F133p39303

Wy henric luden ende Roelf mychels . Scepen in . der stat van deuenter tughe_ openbare dat voer ons in scependoem ghecome_ is . Ermghard wilneer gheneken ghenekens dochter . ende dede aldaer ene ghiftinghe / ende ghaf mit hore_ vryen en_ gueden willen slicht van der hant . alse toe behoef der armer zieken in des hilghen ghiests hues . achtien schillinghe cleynre pe_ninghe iaerliker renthe_ payments daer me_ in der tijt ghemeenlic in der stat van deue_ter tyns ende hueshuer mede betale_ mach . alse vyte_ eruen ende huysinghe_ voer en_ achter die gheleghen sin in der stat va_ deue_ter in der bisscops~strate_ daer dat ene nv af toe~behoert henrike den hoefslagher . ende dat ander egbert strubbe_ tusschen den erue ende den hues . lamberts den . smit an die ene ziit . en_ tusschen der my_re~broeder erue an die ander ziit . ende daer toe so ghaf sie toe behoef dier vors_ arme_ neghen grote payments alse vors_ is . alse vyten erue en_ hues dat gheleghen is in + der stat va_ deuent_ . vp den hornic van der broderstrate_ dat b_ten der cremester nv toe~behoert en_ iaerlix daer vyt te heffen ende te bore_ die vors_ iaerlix pe_ningrenthen . die ene helfte daer af toe zantghanghe_ ende die ander helfte daer af toe paesschen . erfliken en_ eweliken alse toe behoef dier vors_ armer zieken sonder arghelist . Jn orconde des so hebben wy onse seghele an desen breef ghehange_ ghegheue_ int iaer ons h_en dusent drie + hondert drie ende neghentich des donredaghes na den hilighen paessche daghe .