Corpus Van Reenen-Mulder (CRM14): Oorkonde F133p39402

Wy Peter van lyenden ende lubbert iohans soene scepen in der stat va_ deuenter tughen openba_e / dat vor ons in scependoem gecome_ sin . henric bouma_ ende ghertrued siin echte wiif mit den selue_ henric hore_ ma_ alse hore_ rechten momber en_ becanden dat sie mit hore_ vryen willen erfliken en_ eweliken hebben vercoft . halenberghen michels een punt gheldes cleynre pe_ninghe iaerliker renthen payments daer me_ in der tyt gemeenlic in der stat va_ deue_t__ tyns ende hueshuer mede betale_ mach alse vyt hore_ erue en_ hues voer en_ achter / daer sie nv inne woene_ dat gheleghen is in der stat van deuent_ in der noerdenberghestrate_ mit den achtersten eende streckende vp der statmure / tusschen den erue en_ den hues gherijts van randen an die ene ziit / ende tusschen den erue en_ den hues coenraets ten dune an die ander ziit daer die vors_ halenbergh te voertijts twe punt ghelts iaerliker renthen / daer toe vyt heft ghecoft . ende die iaerlix daer vyt te heffen ende te boere_ die ene helfte daer af toe Paesschen ende die ander helfte daer af toe zantghangen als men ghemeenlic in der stat van deuenter tyns ende hueshuer plecht te heffen ende te boeren / alse voer ene su_me geldes die hem wal is betaelt . beholdelic dier vors_ halenb_ghe hoers voer~briefs dien sie van dien vors_ tween punden daer vp heft / ende beholdelic henric thoemmaker vyten vors_ erue en_ hues drie punt ghelts cleenre pe_ninge iaerliker renthen en_ voert in den vors_ dinge_ anders elkermalcke siins rechts . al arghelist hiir vytgesproken Jn orcond des hebben wi onse seghele an desen brief ghehangen Jnt iaer ons heren dusent drie hondert vier ende negentich vp sente ghertrude dach