Corpus Van Reenen-Mulder (CRM14): Oorkonde F133p39505

Wy Roelf michels soen en_ . henric scheuing in der tijt Prouisore_ va_ des hilighe_ gyests huys bynne_ der stad va_ deue_t__ gheleghen ghelien ope_bare mit dess_ breue vor ons en_ vor onse nacome_linghe_ p_uisore_ des vors_ huyses / dat wy mit ons_ goede_ wille_ en_ ghanse_ berade alse va_ beuelinghen dier ghemeynre Scepe_ en_ Raets der stad va_ deuent_ o_me redelik_ ende bescheyde_ne zake_ wille / hebbe_ gheloeuet zekerlike_ en_ vastlike_ . iaerlix bynne_ der stad va_ deuent_ te gheue_ te betale_ en_ co_merlos te leuere_ . h_en ioha_ne va_ elte_ ene_ preester vicarius in der kercke_ va_ deue_t__ en_ . aleyde_ duflers sijnre nichte_ / hom beyde_ teghader . alse langhe alse sie leue_ / en_ hoerre enich alleyne die va_ he_ beyde_ lest leuet . Neghen en_ vijftich p˚nt pachtghelts alsolix payme_ts alse daer me_ in der tijt in de_ lande va_ zallant de_ h_en va_ de_ lande sine pacht ghemeynlike_ iaerlix mede betaelt / elkes iaers vp sente Peters daghe ad cathedram achte daghe vore ofte achte daghe na onbegrepe_ . En_ weert zake dat wy Prouisore_ vorghenoemt ofte onse nacomelinghe_ enighers iaers vp de_ vors_ termien versuemich weren in dier vors_ betalinghe_ des oft god wil niet gheschien en zal . so moghe_ die vors_ her ioha_ en_ . aleyt sijn nichte . ofte hoerre enich alleyne die lest leuede / de_ vors_ neghe_ ende vijftich p˚nt pachtghelts . ofte so wes he_ daer af da_ achterstedich were vyt doen pa_den sonder vertrec en_ sonder wedersegghe_ . mit alsulke_ cost alse sie dan daer o_me doen moste_ vyte_ gheredesten en_ gheleghenste_ g˚de rure_de of onrure_de . so waer dat gheleghen w_e bynne_ of bute_ der stad van deue_t__ ghelike verzete_ pacht / of verzeten tyns / dat dan de_ vors_ huyse / dat des hilighe_ ghiestes huys ghehiete_ is tobehoerde . al arghelist hier vyt~ghesproke_ Jn orco_de dess_ vorscr_ dinghe en_ bi ghehiete der scepe_ en_ rades vorscr_ so hebbe_ wy Roelf en_ he_ric prouisore_ vorghenomt ons_ zelues zeghele an dess_ breef ghehanghe_ Ghegheue_ int iaer ons h_en dusent drie hondert vijf en_ neghe_tich des mane_daghes na Sacraments~dach .