Corpus Van Reenen-Mulder (CRM14): Oorkonde F133p39506

Wy Roelf ter bruggen ende Roelf mychels soene Scepen in der stat van deuent_ tughen openbare dat vor ons in scependoem gecome_ is herma_ blawe ende dede aldaer ene rechte ghiftinge . ende bezatinge van sinen deele . als hij heft an alsulken iaerlix pe_ningrenthen ende wiinrenthen ghelegen binne_ der stat van deuent_ vyten eruen ende huysen . als hiir na bescreue_ staen . Jnt yerste siin deel van zestien p˚nt ghelts / cleenre pe_ninghe ende ene take wiins iaerliker renthen . vyt erue ende huyse die nv toe~behoren herma_ coerneken ende sinen wyue ghelegen in der waterstraten an den kerchoue . vp der steghelen . Voert siin deel van tweelf punt gelts cleenre penninghen iaerliker renthe_ . vyt erue ende huyse wigbolt berends soene vp den berghe . an der steghelen daer hij nv inne woent . Voertmeer siin deel va_ tweelf p˚nt ghelts . cleenre pe_ninghe ende ene quaerte wiins iaerliker renthen vyt erue ende huys / dat nv toe~behoert clawes ghersing / dat ghelegen is in der bisscopstraten an der stat~mure / ende an erue ende hues / arents van buld_en . Voertmeer siin deel van tweelf p˚nt ghelts cleenre pe_ninghe iaerliker renthen vyt erue_ en_ huysen te~ghader gheleghen . dat ene an den and_en vp den berghe . dwers ouer die strate theghens den kerchoue . tusschen den erue ende huys lamberts ter beke an die ene ziit Voertmeer siin deel van drien punt ghelts . cleenre pe_ninghe iaerliker renthen vyt erue ende huys henrix van coesuelde ghelegen vp den berghe in der mensstraten . voertmeer siin deel van dorde + half p˚nt gelts cleenre pe_ninghe iaerliker renthe_ vyt erue ende huys dat nv toe~behoert berent hermans soen in der bisscopstraten bij den brincke / an erue ende huys bruens calueswinckel . voertmeer siin deel van eenre marck ghelts . iaerliker renthen vyt erue ende huys dat toe~behoert zwenen herings gheleghen in der broederstraten . voertmeer siin deel van neghen schillingen brabansche / ende drien pinten wiins iaerliker renthe_ . vyt erue ende huys dat eermaels toe~behoerde Lamberte van heeck gheleghen vp den berghe . an erue ende huys peters van lyenden en_ siins wyues Ende viifte + half schillingh brabansche iaerliker renthe_ . vyt erue ende huys dat nv toe~behoert heynen ter schuren . dat ghelegen is vp den berghe Jn alsulker manieren wa_neer die vors_ herma_ afliuich is gheworden . soe sal siin deel van alle dien vors_ iaerlix pe_ningrenthe_ . eruen en_ comen sonder yemans wederseggen / erfliken ende eweliken te bliuen in des hilghen ghiests huys / mer dat dan daer voer weder die prouisoren in des hilghen ghiests huys vors_ in der tijt tot ewighen daghen elkes iaers / alse dan syne iaertijt is / backen soelen laten te brode vier mudde weyts . ende solen dat broet dat daer af coempt ende een half vat boteren delen laten armen luden voer siin ziele . ende soe wes dan tot enighen termine van dien vors_ penningrenthe_ bauen die vors_ aelmosen ouerbliuet . dat sal comen tot der armer zieken behoef in des vors_ hilghen ghiests huys / voert so wil die vors_ herman dat dan die vors_ prouisoren in der tijt voer horen arbeit die vors_ iaerlix wiinrenthe_ hebben solen beholdelic dien vors_ herma_ dat hij desse vors_ ghiftinge ende bezatinge verwandelen of wederroepen mach een deel of al wa_neer dat hij wil . sonder arghelist Jn orconde des so hebben wy scepen vors_ onse seghele an desen breef ghehange_ ghegheuen Jnt iaer ons h_en dusent drie + hondert viif en_ neghentich vp sente Johans auont te middenzoem_ .