Corpus Van Reenen-Mulder (CRM14): Oorkonde F133p39507

Wy Roelf ter bruggen ende Roelf mychels soene Scepen in der stat van deuent_ tughen openbare dat vor ons in scependoem ghecome_ is Elsebe herman blawen witlike wiif mit dien vors_ herma_ horen man alse horen rechten momber ende dede aldaer ene rechte ghiftinge en_ besatinghe van horen andeele alse sie heft an alsulken iaerlix pe_ningrenthen ende wiinrenthe_ gheleghen binne_ der stat van deuent_ vyten erue_ en_ huysen als hiir na bescreue_ staen Jnt yerste hoer andeel van zestien punt ghelts cleenre pe_ninghen ende ene take wiins iaerliker renthen vyt erue ende huyse die nv toe~behoeren h_man coerneken en_ sinen wyue gheleghen in der waterstrate_ an den kerchoue vp der steghelen . voert hoer deel van tweelf punt gelts cleenre pe_ninghe iaerlik_ renthe_ vyt erue ende huese wigbolt berents soene vp den berghe an der steghelen daer hij nv ynne woent . Voert~meer hoer deel van tweelf punt gelts cleenre pe_ninghe ende ene quaerte wiins iaerlik_ renthe_ vyt erue en_ huys dat nv toe~behoert clawes ghersing . dat gheleghen is in der bisscopstraten an der stat~mure / en_ an erue en_ huys arents van buld_en . Voertmeer hoer deel van tweelf punt gelts cleenre penninghe iaerliker renthe_ . vyt eruen ende huysen te~ghader ghelegen dat ene an den and_en vp den berghe dwers ouer die strate theghens den kerchoue / tusschen den erue ende den huys Lamberts ter beke an die ene zijt . Voertmeer hoer deel van drien p˚nt gelts cleenre penningen iaerliker renthen vyt erue en_ huys henrix van coesuelde gheleghen vp den berghe in der menstraten . Voertmeer hoer deel van dorde + half p˚nt gelts cleenre pe_ningen iaerliker renthen vyt erue en_ huys dat nv toe~behoert berent h_mans soen in der bisscopstraten bi den brincke . an erue en_ huys bruens calueswinckel Ende voertmeer hoer deel van eenre marck gelts iaerliker renthen vyt erue ende huys dat toe~behoert zwenen herings gelegen in der broederstraten Voertmeer hoer deel van neghen schillinghe brabansche ende drien pinten wiins iarliker renthe_ vyt erue ende huys dat eermaels toe~behoerde Lamberte van heeck / gelegen vp den berghe . an erue ende huys peters van lyenden en_ siins wyues Ende viifte + half schillinghe brabansche iaerliker renthen vyt erue en_ huys / dat nv toe~behoert heynen ter schuren dat gelegen is vp den berghe Jn alsulker manieren wanneer die vors_ elsebee afliuich is gheworden so sal hoer deel van alle dien vors_ iaerlix pe_ningrenthen eruen en_ comen sonder yemans wedersegghen erfliken en_ eweliken te bliuene in des hilghen ghiests huys . mer dat dan daer voer weder die prouisoren in des hilghen ghiests huys vors_ / in der tijt tot ewighen daghen elkes iaers / alse dan hoere iaertijt is backen solen laten te brode vier mudde weyts ende solen dat broet dat daer af coempt / ende een half vat boteren delen laten armen luden voer hoer ziele ende so wes dan tot enighen termine van dien vors_ pe_ningrenthen bauen die vors_ aelmosen ouerbliuet dat sal come_ tot der armer zieken behoef in des vors_ hilghen ghiests huys . Voert soe wil die vors_ elsebee . dat dan die vors_ prouisoren in der tijt voer horen arbeit die vors_ iaerlix wiinrenthen hebben soelen . beholdelic dier vors_ elsebeen dat sie desse vors_ ghiftinge en_ besatinge verwandelen of wederroepen mach een deel of al wa_neer dat sie wil sonder arghelist Jn orconde des so hebben wy scepen vors_ onse seghele an desen breef ghehangen Gegeuen int iaer ons heren dusent drie + hondert viif ende neghentich vp sente Johans auont te middenzoem_ .