Lijst
Corpus Van Reenen-Mulder (CRM14): Oorkonde F133p39802
Deventer, 1398
Wy henric van den lare ende lubbert iohans soene Scepen in der stat van deuent_ tughen apenba_e dat voer ons in scependoem ghecome_ sin Gherit hughinc ende Euese siin echte wiif mit dien seluen gherit horen man / alse horen rechten momber ende becanden dat sie mit horen vryen en_ gueden willen witliken en_ wal hebben vercoft in ene_ gherechten en_ steden erfcope aleyden van zutphen drie pont ghelts cleenre penninghe iaerlik_ renthen / payments daer men in der tijt ghemeenlic in der stat van deuent_ tyns en_ hueshuer mede betalen mach / alse vyten erue ende hues dat gheleghen is in der stat van deuent_ vp den berghe in der menstraten tusschen den erue ende den hues dat toe~behoert iohanne van Oy an die ene ziit / ende tusschen den erue ende den hues dat toe~behoert henric va_ coesuelde ende ghijsen van holten an die ander zijt . Ende iaerlix daer vyt te heffen ende te boeren die ene helfte daer af toe zantghanghen . ende die ander helfte daer af toe paesschen als men ghemeenlic in der stat van deuent_ tyns ende hueshuer plecht te heffen ende te boeren alse voer ene su_me gheldes die hem die vors_ aleyd wal heft betaelt . behoeldelic in dessen vors_ dinghen elkermalcke siins rechts sonder arghelist Jn orconde des soe hebben wy scepen vors_ onse seghele an desen brief ghehanghen Gegeuen int Jaer ons h_en dusent drie + hondert acht ende neghentich des manendaghes na sente margrieten dagh der hilgher Joncvrouwen