Corpus Van Reenen-Mulder (CRM14): Oorkonde F133p39902

Wy henric scheving ende Roelf mychels soene in der tijt prouisoren van des hilghen ghiests hues binne_ deuent_ gheleghen tughen apenbare mit dessen brieue vor ons en_ vor onse nacomelingen in der tijt . prouisoren dat wy o_me orber en_ nutticheit erfliken en_ eweliken hebben verwisselt en_ ouerghegheue_ slicht van der hant / gheride zwaueken en_ sinen erfg_ / een stucke lands dat gheleghen is vp den ghoer dat een tynsguet is / dat holt in der maten twe h˚nt ende twe en_ tsoeuentich roeden lands Ende die veersten colcackers die holden drie morghen twe hunt ende twe ende twintich roeden lands . Ende die and_e colcackers twe morghen / ende vp der brede achte + half h˚nt ende zesse ende twintich roeden landes . ende dat hofstediken bij der bursenre~straten dat holt twe hunt viertich roeden landes . ende dat pessiken bij des vors_ gherits hues / mit den wilghen viif ende tsestich roeden landes . Ende dit vors_ land holt althegader in der mate . achte + haluen morghen ende viif en_ tsoeuentich roeden landes . Ende dit vors_ land plach voer dess_ vors_ wisselingen te wesen tynsguet ende sal nv voert~an wesen zutphensch leen alse o_me enen rechten wederwissel . daer ons tot des vors_ hilghen ghiests hues behoef wal an ghenoeghet alse voer alsulic guet en_ land alse hiir na bescreuen stiet / dat wi daer voer weder ontfangen hebben / tot behoef des vors_ hilghen ghiests hues / alse een stucke landes ghehieten stellikens~acht_ dat gheleghen is an beiden tsiden des vors_ hilghen ghiests lande Ende daer toe een acker lands ghehieten die halue acker / die oec gheleghen is an beiden tsiden des vors_ hilghen ghiests lande . Welke twe stucke lands te~ghader begrepen hebben in der mate zoeuen morghen ende viiftich roeden lands . Ende also alse die gheleghen sin / in den kerspel van der woelde / ende in der buerschap ten weerde ende dit selue land plach te wesen voer dess_ vors_ wisselingen een zutphensch leen en_ sal nv voert~an wesen / in des vors_ hilghen ghiests / eyghen guet . ende des~gheens die hebber ende besitter daer af is sonder arghelist Jn orconde des soe hebben wy henric ende Roelf prouisoren vors_ onse zeghele vor ons ende voer onse nacomelinghen prouisoren in der tijt an desen brief ghehangen Gegeven int Jaer ons h_en dusent drie + hondert neghen en_ neghentich des manendaghes na dertyenden daghe .