Corpus Van Reenen-Mulder (CRM14): Oorkonde F133p40001

Wy Roelf mychels soene ende hessel ouereng Scepen in der stad van deuent_ tughen apenbare dat voer ons in scependoem ghecomen sin Johan die becker ende fenne siin echte wiif mit dien seluen iohan alse horen rechten momber ende becanden dat sie mit horen vryen en_ gueden willen witliken ende wal hebben vercoft in ene_ gherechten en_ steden erfcope . Bruen kalueswinckel ende webelen sinen echten wyue / twe pond ghelts cleenre penninghe iaerliker renthen payments daer men in der tijt ghemeenlic in der stad van deuent_ tyns / ende hueshuer mede betalen mach / vyten erue en_ hues dat gheleghen is in der stad van deuent_ vp den b_ghe tusschen den erue ende huijs / dat toebehoert herman den wachter an die ene zijt en_ tusschen den erue ende den hues dat toebehoert albert egberting an die ander zijt / ende iaerlix daer vyt te heffen ende te boeren die ene helfte daer af toe paesschen en_ die ander helfte / daer af toe zantghangen / als men ghemeenlic in der stad van deuent_ tyns en_ hueshuer plecht te heffen ende te boeren / alse voer ene su_me gheldes die hem wal is betaelt . Voert soe becande die vors_ Bruen / vp die selue tijt / dat hij mit sinen vryen en_ gueden willen / dier vors_ webelen sinen wyue heft ouerghegheuen / mit dien vors_ tween ponden te besatene te wendene ende te kierene / daer sie wil . ende daert hoer ghadelic is / behoeldelic in dessen vors_ dinghen elkermalcke siins rechts sonder arghelist Jn orconde des soe hebben wy Scepen vors_ onse seghele an desen brief ghehangen Gegeuen int Jaer ons h_en dusent vier + hondert vp Sente pauwels Auont Conuersio .