Corpus Van Reenen-Mulder (CRM14): Oorkonde F179p33001

Wy . scepene . Raet . en_ ghemeent der stat van Sutphene . d˚n k˚nt . en_ . kenlyc . alle den Ghenen . dye . desen brijf Solen Sien of horen lesen . . . dat wy thezamene . Ouerdraghen Sijn . dat . dye Scepene . dye jaerlikes jn onser Stat . Scepene Sijn . Nu voertmeyr na desen daghe . dye Scepene / en_ dyen Raet jn onser Stat Setten . en_ kyesen Solen . alle jare . jn manyren . dye hijr nae ghescreuen Staen . also . dat nyet meir . dan twye aghterzuster kyndere . en_ nyet naere . scepene . oft Raet . thezamene Solen wesen . . . Voert . eyn man . dye . eyns anders . doghter . heeft . dye here . en_ . dye Svagher . en solen . noch Scepene . Noch Raet thozame Sijn . . . Voert eyn man . dye . eyns anders . zuster heeft . dye twye Swagherlynche . en Solen . thozamene Noch Scepene . wesen Noch Raet . . . Voert meir dye . zes . Scepene . dye jaerlikes van den Scependoem ghaen . dye Solen . eyn jaer . daer na . dat Sy af ghaen . Raet blyuen en_ wesen . . . Mer als dat jaer gheleden is . dye . ghene . dye nyet Scepene . weder . warden . ghekoren . dye Solen . ghemene Lude . blyuen . ghelike . dat andere . ghemene Lude . d˚en . . . Jn Orcu_de des . hebbe wy onser Stat en_ burghere . zegel ane desen brijf d˚en hanghen . . . Ghegheuen . jnt jaer ons heren . dusent . dry + hv˚ndert . en_ dertych . des vrydaghes . na Senthe wolborghe . daghe . - - -