Corpus Van Reenen-Mulder (CRM14): Oorkonde F179p36901

w_ scepene der Sat van S˚tphen . Tughen Openbarlijcke mit desen Openen brieue dat vor Ons . Sint Gecomen in + gherijchte en_ in + scependome . Gysebert / en_ mit hem Armegh_ Sijn Echte wijf . meyster Gherd de decker gheytten en_ mit hem alijt Sijn Echte wijf . alse mit Oren gherechten vormond_en vurdelijcke vor Ons daer tho ghecoren en_ hem Gegheuen en_ hebben becant dat Se hebben vercoft malck hoer deel van Oren Garden mit sijns deels tobehorene buyten Onser nyer + stad gheleghen Tuschen . . Garden Gher_ tobberchs van der Eener Sijt en_ Garden fyen reijnolts aen de ander Sijt alse Eesseken den potgheytter En_ sijnen Eruent des Garden alinch to hebbe en_ to ghebrucke Erflijcke en_ Eewelijcke en_ hebben daer mede van vp ghelaten en_ vrij verteghen alse mit rechte Solden tot behoef Eessekens vorg_ en_ sijner Eruent . Erflijcke behoelden johan buyckinghe vyter heelfte van meijster . . Gherts deckers Garde Eenen Groten des jaers daer vyt to hebbe en_ to borene woenlijxs payements oft Sijn Eruent Jn Een Orcond des so hebben wij Onser Stad Seghel aen desen brief Gehanghen Gegeue_ jnt Jaer Ons h_en D˚sent drij + hondert neghen en_ Seestijcht opten andach na derteijenden~mijssen