Corpus Van Reenen-Mulder (CRM14): Oorkonde F179p37001

Wy deken ende ghemeyne Capittel des godshuys van zutphen / doen kunt allen luden / ende bekennen met desen teghenwardighe_ brieue / Dat wy ouvermids hulpen / ende vordernisse herren aernt lasts ons scolasters / testamentoer aleyden dye wylneer hertgher cupekij_s wijf was / vercreghen hebben / dertich ouder guldenre scilde / ende dertien pont cleynre penninghe payments ghenghe ende geue in + der tijt jaerliker renten / Dye dye vors_ scolaster / ons ende onsen vors_ godshuze / alze wt husen / ende eruen / daer hy ons dye brieue af ouver~geleuert heuet / wael bewyset heuet / ende opghedraghen heuet / jn manyeren / vorwarden / ende formen alse hier na gescreuen staen . Dat is te wete_ jnt ierste / Dat wy / ende onse nacomelinghe to ewighen daghen / alle jaer tot dien vors_ dertich ouden scilden / ende dertien ponden / also vele / van ons ghemeynen capittels goede / ende onsen besten jaerrenten / jaerlijcs wt zolen zetten / Dat dye zelue dertich oude scilde / ende dertien ponde met dien vors_ renten / dye wy jaerlijcs wt zulen zetten / te~samen maken / oft maken solen / alle jaer twe + hondert ende neghentien pont . van welken vors_ twe + hondert ende neghentien ponden / wy ende onse vors_ nacomelinghe gheuen solen to daghelijcs presencie in + den chore / alle daghe twelf scillinghe cleynre penninghe payments voer~ghenoempt / onsen concanoniken / dye in + der tijt teghenwaridigh sijn / in den achte ghetyden van + den daghe / Dye homisse voer een getijt gherekent . Dat is te weten / tot elken ghetyde / Achtien penninghe payments voer~ghenoempt + . Dye zelue achtien penninghe gelike te deylen / onder den ghenen / dye daer teghenwardich sijn in + den chore / van beghinne ten eynde jn elken ghetyde . Behaudelike / alzulker zatinghe / ende ordinancye alze daer af hier na bescreuen steet . Ende so wat van den vors_ Achtien penninghen in ennighen getyde / van den zeuen iersten getyden / ouverl˚ept / dat + men niet gedeylen en can jn helen penninghen / Dat sal dye amptman of dye presencionierre teykenen van elken getyde / ende dat sal hy mede in + der deylinghen brenghen / jnt leste getyde van den dage / Alze in + der completen / met dien Achtien penninghen / dye der completen toe~behoren . Mar so wat daer dan ouverl˚ept in + der completen / Dat ondeylber is / in helen penninghen / Dat sal dye amptman zelue behauden / zonder yemants weder~zegghen . Voertmeer so wye sijn presencye van + der metten verdyenen sal / dye sal ten minsten wesen in + den chore / voer gloria patri van den iersten zalme daer men gloria patri op zinghet oft leset . ende voert verd˚eren in + den chore / ende helpen lesen ende zinghen met vlyete / ende met ynnicheyden to dier tijt toe / Dat dye leste collecte / van + der metten oft pro defunctis / als men pro defunctis hilt / gelesen zy . Mar weert zake / Dat een canonic om ennighe noot zaken / oft om anders ennighe redelike zaken / dye on onder der metten / voer~vielen wt den chore ghinghe / op~dat hy in + den iersten zalme zy / van elker nocturne / ende in den iersten zalme van + der landes voer gloria patri ende in dye vors_ leste collecte / so en mach hy te bityden in dier zeluer metten / en~gheen presencye verzumen . Des ghelijcs en zy / binnen den iersten jntroitum / voer . gloria patri . ende jnt ewangelio / ende in + der leste collecte voer der benedictye ende hy oec mede in + der stacye zy / voert ende weder / des sonnendaghes / oft jn anderen daghen / Als men stacye hilt . Ende jn den anderen zesse ghetyde_ alze in + der priemen / tertie / sexte / noene / vespere ende complete / so en mach een canonic niet verzumen / op~dat hy in + den chore zy / binnen den iersten zalme ende in + der leste collecte . Behaudelike / Oft hy oec wt den chore ginghe te bityden in ennighen vorseyde getide dat dat om alzulken noot zaken / oft redelike zaken zy / Alze voerscreuen sijn . Welker zaken / men sijnre _sciencie bel˚euen sal . Ten weer of yemant van wanzede ende van ydelhede des / also vele ende also droke pleghe / dat des den meesten me_nighen van + den capittel verd˚cht / so sal + men dyen zeluen canonic manen / ende also goet hebben dat hy diere wanzede ende dier ydelheyt ontbere ende bliue in den chore / Oft men sallen wt~scriuen van + der presencye voerghenoempt . Voertmeer alst velt Dat men gheen homisse en zinghet / so sal men dye achtien penninghe / dye der homessen toe~behoren / verdienen in + der zielmissen / ende so wie dan in + den chore is binnen den ierst? jntroitum ende jnt ewangelio / ende jn + der co_mendacye / dye heuet sijn presencie verdient . Voertmeer een nye canonic / dye op halue prouende zit / dye sal b˚eren halue presencye teyn ter tijt dat sijn jaren van gratie om co~men sijn na den decretale / dye paeus jan dye twe + ende + twentichste daer op gemaect heuet / dye aldus beghint . (-) (-) (-) . Ende so wat canonic niet gheordineert of ghewyet en zy / tot dier orden / die sijnre prouende toe~beh˚ert / dye en sal niet dan halue presencye b˚eren tot dier tijt toe / dat hy tot dier voerseyder orden / ghewyet zy / na den decretale / Dye paeus Clemens / dye wijste / daer op ghemaect heuet / die aldus beghint . (-) (-) (-) . Voertmeer So wanneer ennich canonic resident by wille ende weten / des capittels / of der meester parten / wt is . jns capittels orber bi_nen ofte buten zutphen so sal hy binnen dier tijt / alle dye presencie b˚eren / dye hy verdient zoude hebben / of hy ins capittels orber / niet wt gheweset en hedde + . Of dye hy ghemynliken ende alticste pleghet te verdienen als hy thuus is . Voertmeer / een canonic die wittelike ? heuet / also dat hy van anxts weghen sijns liues / te chore niet gaen en darre oft binnen zutphen niet wonen en darre / sijn prouende te verdienen / dye sal dat waer maken by synen ede / also alse dat van auds gewoenlike ende recht is / ende sal dye p_sone noemen / daer hy den anxt af lijdt . Ende als dat gesciet is / so sal + men dien canonic alle dye presencie / dye hy hebben zoude / of dye anxt niet en weer / oft gemynlike te hebben ende te verdienen plach / eer die anxt was / toe~scriuen ende wt~reiken / Ten ter tijt / dat hy volcomen veylicheyt hebbe / ende sijns liues verzekert zy / te zutphen te comen / ende daer te blyuen / sijn prouende te verdienen . Voertmeer . een canonic resident / dye ziek wordt binnen zutphen / ende om sijnre zuucte wil p_ncie b˚eren wil / Dye sal dat kundich doen / den presencionierre / dye dye presencie teykent / ende van dier tijt voert / also langhe als hy ziek is / ende buten sijnre woninghe niet en gheet / so sal hy alle dye presencie b˚eren / dye hy verdient zoude hebben / oft hy niet zieke gheweset en hedde . Oft dye hy gemynliken / ende alticste plach te verdyenen / in der tijt / doe hy ghesont was . Des ghelijcs sal oec een canonic hebben / dye buten zutphen ziek wordt / als hy jns capittels orber wt is . Mar anders niet . Voertmeer een canonic dye misse doet / in onsen vors_ godshuze / die en mach binnen dier tijt niet verzumen . Voertmeer . een canonic / dye gelaten heuet / Dyen en sal dat laten niet te hulpen comen / alze waer by / dat hy daer om jennighe presencie b˚eren sal / hy en zy in + den chore ghelike enen anderen / als oft hy niet gelaten en hedde . Voertmeer . weert zake / dat det ennighe tijt also gheviele / alst wael moghelijc is / Dat en~gheen canonic van dien canoniken dye billic in + den vors_ getiden wesen solen / ende moghen in + der metten en queme / Oft in ennighen anderen getyde van + den daghe / so sole wy / ende onse nacomelinghe / dye zelue achtien penninghe / van dien getyde gheuen ende doen geuen / Den vicarysen / ende den chore~ghezellen / dye daer teghenwardigh hebben geweset in dat vors_ getyde gelike onder vn te deylen . Dese vors_ ordinancye hebben wy ghelouet jn goeden trouwen / voer ons ende onse vors_ nacomelinghe / vaste ende stede te hauden / to ewighen daghen / in alle oren punten voerscreuen . Ende engheenrehande vonde weerwoerde ofte bescudde daer weder te hebben / Alze waer by dat dese zelue ordinancye te~broken / verandert / ofte verminret moghe weerden jn ennigherande manyeren . Ten weert zake dat wy alleghader gemeynliken / ende eendraftliken / des hier~namaels te rade w˚rden dat wy dese vors_ ordinancye strengher maken wouden / Mar ommer niet Rumer . Oft also veranderen wouden / dat daer kenliken gods dienst mede verh˚eghet worde ende niet vernedert . Jn orconde deser dinghe / so hebbe wy onse zeghel aen desen brief ghehanghen . Ghegeuen jnt jaer ons heren dusent drye + hondert ende tseuentich op sente walburghen daghe jn + den meye .