Corpus Van Reenen-Mulder (CRM14): Oorkonde F179p37503

Wij . Richt_e Scepene ende Rait / der Stat van zutphen doen kondich ende kenlijc allen luden / die desen brijef soelen zien oft horen lesen en_ tughen apenbaer mit desen brieue / dat wi sculdich zijt . Joha_ne alpharts zone . ende sine_ erfgenaeme_ tyen gude gulden olde scilde / guet van golde en_ recht van ghewichte . jaerliker pe_sien vyt ons_ Staets gruyt wilke tyen gude olde scilde / iaerliker pe_sien wi en_ onse nacomelinge / betalen zolen joha_ne alpharts zone vorscr_ Ende sine_ erfg_ alle ja_e . alse die ene helfte vp Sinte jacobs misse eens apostols ende die ander helfte vp Sinte pauwels misse Conu_sio ofte bi_ne_ viertenachten nae elken t_mine mit guden olde_ guldene_ scilden vorscr_ Jn alsulke_ vorwerde_ . w_t zake dat johan vorscr_ ofte sijn erfg_ enich . gebreck hedden in eyn deeil oft in + themaele in + der + betalinge der vorscr_ . iarlik_ pe_sien vyt ons_ Staets gruyt vorscr_ dat gebreck moghen see verhalen vyt anders alle onser Staets Re_ten ende gude die . wi nv hebbe_ oft die wi naemaels krighen moghe_ soe waer dat die geleghen w_en en_ vonden worden . vort soe sijt vorw_den dat wi die vorscr_ iaerlike pe_sie wedercope_ en_ losen moghen vp elken t_mine vorscr_ elken olden scilt mit twelf olden scilden guet van golde / en_ recht van ghewichte en_ mit der pe_sien / die me_ dan Sculdich is vp + de_ selue_ t_mijn alse weer als dat . johanne vorscr_ oft sine_ erfg_ van ons en_ onsen nacomelige_ eyn half . jaer the~voren geseget w_e . Jn orcu_de des ende kennisse der zaken vorscr_ hebbe wi onse Staets zegel gehanghe_ an desen brijef Gheg_ jnt iaer ons h_en duse_t drye + - hond_t viue en_ tseue_tigch des vriedaghs nae ons_ vrouwe_ dach Annu_ciat_o .