Corpus Van Reenen-Mulder (CRM14): Oorkonde F179p39303

Wij Richtere ende Scepene . der stat van zutphen tuyghen ende bekennen . den wi den / Cremers / van zutphen gegheuen hebben ende gheuen om oer ghilde te sterken ende stantachtich te bliuen . dat nyemant die wonachtich is binnen onser stat vp sinen vynster off binnen synen h˚yse dagelix g˚et veile hebben en sal dat in dye cremerie Rurende is sii en hebben der cremer ghilde irst ghewonnen . En_ wye alsullic g˚et veile heuet ende an dat ghilde niet en is / dyen moghen dye gildemeisters byeden offt doen byeden dat hii dat gylde wynne bi sine_ köere Ende soe sal hii dat ghilde winnen Ende en winnet hi dan dat gilde niet soe moghen oen die ghildemeist_s alle daghe doen penden mit ons stades bade nae dyen dat dat bot geschiede elkes daghes v˚r tyen scillinghe alse tot zutphen genghe en_ gheue zijt thent ter tijt toe dat hii dat ghilde winne offte die comenscap van + der Cremerien vertye en_ aflate . Ende den koer sal die stat halff hebben ende dat gylde halff Ende wie dat ghilde winnen sall die sal den gilde gheuen . tweeleff olde vlemsche groit ende twee pont wasses tot des gilden behoeff . Ende weert sake dat yemant sin gilde vpgheue mit drijste off mit hoemode / of om~dat oen die gyldemeisters boeden van + des ghilden wegen to doen dat den ghilde tobehoerde / die solde dat ghilde van nyes winnen / offt hii daer nyee an gheweest en hedde En_ dat moghen oen die gyldemeist_s byeden off doen ghebieden in maniren soe vors_ steit / voert soe en solen en~ghene gaste dye g˚et veyle hebben dat in dye cremerie Rurende is / voert doen offt om~gaen mit tafletten anders dan vp den donredach en_ vp + den sonnendach . vytgename_ alas een gast irst comt in onse stat / soe mach hi des selue_ daghes . offte des anderen daghes dat voert doen offt mit sine_ tafletten om~gaen / ende anders vp ghene_ dach dan des donredags offt des sonne_dags soe vors_ / mer dan en mach die gast bi_ne_ eynre maent nae dyen niet meer vort doe_ noch om~gaen / in ons_ stat / offt hi bi_ne_ der maent weder queme / dan des donredags en_ sonne_dags vors_ Voert en solen en~ghene gaste voert doen bi_nen onser stat / Jn + den jaermerkeden off vp onse aflaet sii en ghaen staen beneden onsen burgeren daer oen met rechte boert te staen . voert soe en sal nyeman voert doen tot ghenre tijt vp den kirchoff / off in dye kircke bi eynre pene_ van ene_ ponde En_ dat solen die gildemeist_s w˚t~penden halff den scepene_ ende halff den gilde . Voert wes die meeste hoep van + den gildebrud_s auer~eyn~draghen tot des gilden orber dat mogen sii den gildemeist_s beuelen oren gildebruders te byeden En_ wie sijc in + den gebade verbreke dien moghe_ die gildemeisters seluer penden off doen penden onbeclaget tot wat tiden sii willen bi wat pene_ dattet hem gebaden is / tot viiff schillingen toe En_ die vijff scillinge sal dat gilde hebben alle dese vors_ punten soelen vast ende stede bliuen tot der scepen weder~segghen all argelist w˚tgespraken . Jn orconde der wairheit soe hebben wii onse stades segell an desen apene_ brieff gehangen geg_ jnt jaer ons heren . M˚ . drie + hondert / drie ende tnegentich des vrydags nae sunte Gertrude dach . .