Corpus Van Reenen-Mulder (CRM14): Oorkonde F573r36801

@ Wy , Egbrecht , cureit der kerken van Hesselt , ende Beernt , cureit tot Dwinghelo , capellaen heren Egbrechts voerseit , maken cont ende kenlic allen luden , dat voer ons ziin comen Dyderic Borcgherdes , Wemme , ziin echte wijf , Johan , Henric ende Woube , hoerre beider echte kiinder , dien wi toenden enen brief sprekende van den proest , deken ende capitel der kerken van zinte Peter tUtrecht in allen vorwarden ende manieren , alse hier + nae bescreven staen , welken brief wi hem overlezen ende overghelevert hebben ghans ende ghave sonder enigherhande toesegghen , ghebrec ende rasure , sprekende van worde te woerde aldus Ende doe Dyderic , Wemmen , Johan , Henric ende Wouben voerghenoemt den voerseiden brief overlezen was ende openbaert ende zi hem wael verstaen hadden , doe beleden zi ende bekenden mit hoeren vryen wille alle die vorwarden waer te wezen , also alse ghescreven staen in dezen voerghenoemden brief ende dat si dit voerghenoemde goet hebben ende bezitten van den heren proest , deken ende capitel der kerken tsinte Peter voerghenoemt in allen vorwarden ende manieren , alse hier + voer bescreven staen in dezen voerseiden brieve der heren proest , deken ende capitel voerghenoemt ende geloveden mede in goeden trouwen dezen voerseiden heren proest , deken ende capitel vol te doen nae den zinne ende houdenisse des briefs voerscreven zonder enich vertrec ende wederzegghen . Hier hebben over gheweest alse tuuchslude , doe dit gesciede in dierre stede her Johan van Sleen ende her Johan van Compestelle , canonics der kerken tsinte Peter voerseyt , Sweder Hellebreker ende Elyas van Woudegghen . In orconde deser voerghenoemder zaken bezeghelt mit onsen zeghel . Ghegheven int jaer ons Heren duzent drie + hondert acht ende tsestich des Vriedaghes nae onser Vrouwen dach Assumptio