Corpus Van Reenen-Mulder (CRM14): Oorkonde F575r37401

@ Allen denghenen , die desen brief zoelen sien of horen lesen , doe ich verstaen , Peter van Blydensteden , ende enkenne openbaer mit desen openen brieve , dat ich mit vryen willen miins selves , mit rade Agnesen miins echten wijves , mit consente Henrickes , onses sones , ende alle onser rechter erfnaemen hebben erflike tozamene vercoft ende opghelaten , vercopen ende oplaten openbaer mit desen openen brieve heren Johanne , den abdte ende den ghemenen convente to Dickenynghe vieftiene verendeel boteren jaerliker pachte , gheleghen op Hakeswolde bijnnen den kersspele van Blydensteden , mit alsoelken rechte , als wi die ghecoft hadden tieghen Herman , here van Kuenre , Mechtelde , sinen echten wijve , Boldewiins dochter van der Ese , ende Hermanne van der Ese , oeren gheborenen mombaer , to bitalen alle jaer op Michaels dach mit alsoelker mate , alse Boldewiin van der Ese voers_ die voernoemde pacht to boren plach , om eyne summe van ghelde , die ons wittelike ende wal bitaelt is , in alsoelken manieren , dat die abbet ende dat convent van Dickenijnghe desse voerghenoemde boterpacht erflike ende ymmermeer vrij bisitten ende ghebr˚ken moghen sonder yenegherhande wederzegghen van ons ende van al onsen erfgenaemen , ende zoelen hem dier boterpacht voernoemt to landrechte waren voer alle dieghene , die daer to rechte op spreken moghen , al arghelist uutghesproken . In kennesse der waerheyt hebbe ich , Peter van Blydensteden voerscreven , desen openen brief biseghelt mit mynen zeghele voer my selven , voer Agnesen , miin echte wiif , ende voer Henric , onsen sone , voers_ , went sie selven ghienen zeghel en hebben . Ende om ene meerre vestenisse desser vorwerde hebbe wi ghebeden eynen eersamen ridder , heren Johanne van R˚nen , onsen heren , dat hi dessen openen brief voere beseghelen wille mit sinen zeghele . Ende wi , Johan , here van R˚nen , om bede willen Peters , Agnesen ende Henrix voerscreven , want desse stede coep ende desse oplatinghe , alse voerscreven is , voer ons ende voer den ghemeynen kersspele van Blidensteden geschied is , daer die pachtlude deser voernoemder boteren den abdte ende den convente van Dickenijnghe die jaerlix loveden to bitalen ende to Dickenijnghe to leveren , daer wi to richte seten in enen hegheden heymale , hebben onsen zeghel voere an desen openen brief ghehangen tot eynen ewighen tueghe alle desser vorwerde voerscreven , in den jare ons Heren dusent drie + hondert vier ende seventich op sente Magnus dach eens heilighen mertelars .