Corpus Van Reenen-Mulder (CRM14): Oorkonde F575r37701

@ Allen luden die dessen brief zoelen sien ofte horen lesen . doe wy verstaen Johan Menssing van haren . Ende Godekien van Echten gheheten van haren . en_ enkennet des dat wy mit vryen willen vnses selues ende mit Rade vnser erfghenamen eyne gheliike wessele hebben ghedaen mit heren Johanne den abte ende den ghemeynen Conuente van dyckenynghe als mit erue ende mit g˚ede Jn allen manyeren als hiir nae ghescreuen staet . . Wy Johan menssing van haren Ende Godekien van echten gheheten van haren voers_ . hebben ouer~ghegheuen ende erflike opghelaten den abte ende den Conuente van ? voers_ . al vnse erue ende al vnse g˚et gheheten tot altinghe ende to Rossinghe met torve en_ met twighe met aller slachter not ende met allen sinen to~bihoerne alse dat to halen ende voert bynnen den kersspele van beylen gheleghen is . wtghesproken vnse eyghene hoerighe l˚ede also dat die abbet ende dat Conuente van dyckenynghe voers_ . des voers_ g˚edes erflike ghebruken moghen ende dat ewelike ende vmm_meer vrij bisitten moghen sonder yenegherhande hinder ende sonder yenegherhande wedersegghen van vns ende van allen vnsen erfghenamen Ende zoelen hem des voers_ g˚edes waren voer allen den ghenen die des to Rechte comen willen des hebbet die abt ende dat Conuent van dyckenynghe voers_ . vns ende vnsen erfghenamen weder ouerghegheuen ende erfliike opghelaten al oer erue ende al oer g˚et to bork bynnen den kersspele van anlo met torue met twighe met aller slachter not ende met alle sinen to~bihoerne als die brief holdet den zee vns daer op ghegheuen ende biseghelt hebben / holinghe des briefs quessinghe der zeghele alle nye + vonde ende al aerghelist wtghesproken . Jn kennesse der waerheit hebbe wy Johan menssing van haren . ende godekien van Echten gheheiten van haren voers_ dessen openen brief beseghelt met vnsen zeghelen voer vns seluen ende voer alle vnse erfghename_ Ghegheuen Jnt Jaer vns heren / dusent dree + hondert seuen ende seuentich des donredaghes nae pinxter~daghe