Corpus Van Reenen-Mulder (CRM14): Oorkonde F585r39802

JC Seyne Mulerd jn der tiit Richter to hasselt doe kundich allen luden . ende tughe mit desen openen brieue dat voer my ghecomen is int gherichte en_ in enen ghehegheden heymael en_ voer coernote_ en_ gherichtes~lude hier na bescreuen Gheert ludekens sone en_ ghelyede des dat hi voer hem ende voer siin erfg_ ghegheuen heeft ende gheeft ter eere godes om salicheit siinre zielen . siinre olderen ende der gheenre zielen salicheyt daert aff ghecomen is . machtich siins liues myt sinen vryen wille en_ mit gueden berade Slecht van der hand rechte~voert afstaende na den landrechte alse recht was erflic ende ewelic to besitten den magheden en_ weduen die nv ter tiit in reynicheyt to~gader wonen bynnen Campen . ende horen nacomelinghen in der were gheleghen bouen sinte Nicolaes kerke streckende van der hofstrate bylanx der steghen op den borghel de helfte van tweleff morghen landes gheleghen in den kerspel van hasselt daer an de ene siit ghelandet is johan schilder . En_ an de ander siit johan voern . Mit huse Mit hofstede ende mit allen sinen tobehoren alst lubben kinder van der ae daert hem van an~gheruert is plach to te + behoren Ende de vorscreue_ Gheert verteech al~daer rechtevoert voer hem en_ voer siin erfg_ van den vors_ ses morghen landes erflic ende ewelic to behoef der megheden ende weduen vors_ mit ordel en_ mit rechte Ende droecht hem op voer een edel eyghen myt vertichnisse ende oplatinghe alse recht ende ghewoenlic is en_ mit allen rechte dat recht is alse dat landrecht daer aff wyset Also dattet hem erflic vast is gebleuen . en_ ten landrechte niement breken en mach . Ende hi louedet hem Cummerloes to waren voer een edel eyghen hoe men dat myt rechte waren sal voer hem en_ voer siin erfg_ en_ voer al de ghene de des to rechte komen willen . jn aldusdanighen vorwarden dat se dat besitten ende ghebruken hebben sullen van den ses morghen vors_ ende horen erfg_ niet to erven . Oec weert sake dat die meghede en_ weduen vors_ of hore nacomelinghe niet wonachtich en bleuen in der were vors_ ende se by Rade des Prins van windesym anders woer vueren wonen bynnen Campen off buten So solden de ses morghen vors_ hem evenwal volghen ende tobehoren in allen vorwarden vors_ . Alle dese vorwarde vors_ ende ouergheuinghe heft Gheert vors_ voer my ghewilkoert ende ghedaen in den seluen gherichte voer hem en_ voer siin erfg_ . Al arghelist wtghesproken . hier waren ouer en_ an alse coernote_ en_ gherichtes~lude johan haghenbeke en_ wolter ten toerne . en_ anders vele gueder lude . jn een tuych der waerheit heb ic Seyne schulte vors_ miin zeghel om bede willen Gheerde vors_ an desen brieff ghehangen . Ende ic Gheert ludekens sone vors_ hebbe miin zeghel mede an desen brief ghehangen om de meerre vestenisse wille ende ten tughe der waerheit Ghegheuen int jaer ons heren dusent drie + hondert acht + en_ + neghentich des dinxsdaghes na Reminiscere