Corpus Van Reenen-Mulder (CRM14): Oorkonde F585r39901

Jc johan ten toerne schulte tho hasselt jnder tijt doe k˚ndich Allen luden mit dessen opene_ brieue dat vor mi gecomen is daer ic sat to gerichte jn ene_ gehegeden heymale johan ludykens zoen en_ lyede daer vor my dat hij mit sine_ vryen willen en_ mit g˚eden berade gegeue_ heefft vor hem en_ vor sijn erfg_ jn die ere godes en_ om wille_ lutgaerde en_ Alyde sijnre twyer kinde_ den abbet en_ den ghemene_ convent van dyckeningen dat achtendeel vanden Erve ten kote dat nv t_ tijt vp data dess brieffs johans vorscr_ is als dat gelegen is an tween stucken landes die holden dertyen morghen to bezittene en_ to brukene erflijc ewelijc en_ vmm_meer mit huse en_ mit hove mit torve mit twyghe mit water mit weyde mit weghe mit velde mit dyke mit weteringe mit aller slachter not en_ mit alle sine_ toe~behoerne also als dat gelegen is van welke_ tween stucken landes vorscr_ an die ene zijd va_den ene_ stucke by geervet en_ geguedet is R?quijn vanden toerne / En_ an die ander zijd aernd vanden brincke / En_ an den andere_ stucke an beyden ziden aernd van den brincke En_ droech den abbet en_ den co_uente vorscr_ dit vorscr_ g˚et en_ erve daer vor mi vp jn gerichtes hant mit vertichnisse en_ mit vplatinge als ordel en_ recht wysede en_ gewoenlijc is to behoef des abbedes en_ dess co_vente? vorscr_ also dat johan en_ sijn erfg_ vorscr_ an dit vorscr_ erve en_ g˚ed ghee_rehande Recht beholden en hebben en_ verteech alles Rechtes en_ ansprake die hij off sijn erfg_ daer vmm_meer an hebben moghen En_ louede den abbet en_ den convente vorscr_ dit vorscr_ erve en_ g˚ed to warene vor een edel eyghen en_ vor alke ansprake vor al die ghene die dess to rechte comen willen al argelist vyt~geseget Hier were_ an en_ over alse gerichtes~lude tydeken stam Maes ten walle orte hagenbeke en_ anders vele gueder lude / jn tuych der waerheit so hebbe ic joha_ schulte vorscr_ mijn zegel an dessen brieff gehangen om bede wille_ van beyden zijden / En_ om der meerre vestnisse willen so hebbe ic johan ludikens zoen vorscr_ mijn zegel mede an dessen brieff gehangen vor mi en_ vor mijn erfg_ Geg_ jnt jaer ons here_ dusent drye + hondert neghen en_ tneghentich dess so_nendag__ vp sante matheus dach ap_li et ewangeliste