Corpus Van Reenen-Mulder (CRM14): Oorkonde F590r37501

WJ . . Scepen ende . . Raet ende ghemene borghers dier stat van Campen doen kont allen luden en_ betughen Openbaer jn desen Openen brieue dat wi eenparlike ouerdraghen sin mit dien Ersamen luden . . Scepen en_ . . Raet ende . . ghemenen borghern dier Stede van Deuenter en_ van Swolle aller pvnten ende vorwarden die hijr nae + uolghen ende sekern ende loeuen an gueden trouwen drie jaer langh nae daten dies briefs hem die stede ende vast te holden / ende niet te breken enighes synnes / jnt jrste dat wi tot hem ghansen vollenkomen gheloeuen sullen hebb_ alz onse vorvaders ghehat hebben Voertmer weer yemant die gheweldelike saken dede jn den lande van zallant te waeter oft te lande oft in dier zuyderzee soe we dar irst bij komen konde van ons oft van hem / die solde daer ouer richten sonder vertreck ende soe wes dar af queme dat sullen zie mit ons / ende wi mit hem ghelike vytddraghen / Voertm_ were yemant die der stede yenich ontseghede oft vyant woerde oft ouerlast dede onontseghet dat sulle wi mit dier stat dier niet ontseghet en js oft neghien ouerlast ghedaen en js veruolghen an dien ghonen die die ontsegginghe ghedaen hadde oft die ouerlast onontseghet / en_ weert dat die niet rechtes en_ bescheydes bij dier Stat en_ ons bliuen en wolde soe sal die stat en_ wi / dier voerscr_ stat hulp_e werden bynnen eere maent op dier stat ende onses selues ghewin en_ verlies Voertm_ soe / en sulle wi dier twier stede viende jn onse Stat buten oeren consente niet veylighen Voertm_ soe en sulle wi / dier ander stede vyende niet holden oft huusen oft beholplic wesen / jn ghienrehande sake_ die hem te staden moghen komen ende dien voerscr_ onstade doen moghen / Voertm_ waert sake dat enighe lude quaemen jn onse stat die der ander stede enich vyende weren / ende die stat / oft yemant van oere weghen wolde claghen dar solde + men ouer richten onvertrect Voertmer soe en sulle wi noch soenen noch vreden buyten den andern twen steden voerscr_ sij en hebben mit ons eenen eenparliken vrede oft soene Voertm_ soe segge wi vyt jn allen desen voerscr_ pvnten dien Greuen van hollant ende sijne onderzaten Voertm_ waert sake dat wi oft yenich van + den andern twen steden voerscr_ tot yenigher tijt sonderlinghen wille oft hardecheyt hebben wolden jn yenighen pvnte voerscr_ soe wes dan die twe van ons / oft van + den andern twen steden voerscr_ dar van ouerdroghen dies solde die dorde stat volghen also datter dar mede dore solde ghaen / Voertm_ wert sake / dat wi oft die twe stede voerscr_ vorebede hadden en_ ons mit dier voerscr_ stede een / oft dien twen steden voerscr_ wedervore dat die stat bescheyt mochte hebben bij dien twen steden dat ? sij dan soenen oft vreden dies solde wi oft die dorde stat / die de vorbede hadde volghen vytgheseghet h_en heberts van putten lief en_ sloten / Voertm_ alle saken de van desen pvnten ende vorworden comen moghen / sullen wi mit dien twen steden ende die twe stede mit ons ghelike vytdraghen Alle arghelist ende quade behendicheyt jn allen desen pvnten en_ vorworden voerscr_ clarlike vytgheseghet jn kennisse dier waerheyt en_ om vestenisse aller dinghe voerscr_ op~dat die stede en_ vast bliuen alz voerscr_ js soe hebben wi onser stat zeghel an desen brief doen hanghen Gegheuen jnt jaer ons h_en Dusent drie + hondert vijf en_ tsouentich op sante jacops Auent dies heylighen Apostoles