Corpus Van Reenen-Mulder (CRM14): Oorkonde F590r37503

WJ . . Scepen en_ . . Raet en_ ghemene borghers dier stat van Campen doen kont allen luden ende betughen openbaer jn desen Openen brieue dat wi eenparlike ouerdraghen sin mit den Ersamen luden . . Scepen en_ . Raet en_ . ghemenen borghere_ dier stede van Swolle en_ van deuenter aller pvnten en_ vorworden die hijr naeuolghen ende sekern ende loeuen an gueden trouwen drie jaer langh nae daten dies briefs hem de stede en_ vast te holden ende niet te breken enighes synnes / jnt jrste dat wi tot hem ghansen vollencomen gheloeuen sullen hebbe_ alz onse vorvader ghehat hebben / Voertm_ were yemant die gheweldeliken saken dede jn dien lande van zallant te waeter oft te lande / oft in dier zuyderzee / soe we daer irst bij komen konde van ons oft van hem / die solde daer ouer richten sonder vertreck en_ soe wes dar af queme / dat sullen sij mit ons ende wi mit hem ghelike vytddraghen / Voertm_ were yemant die der stede yenich ontseghede oft vyent worde oft ouerlast dede onontseghet dat sulle wi mit dier stat / dier niet ontseghet en js / oft neghien ouerlast ghedaen en js veruolghen an dien ghonen die die ontsegginghe ghedaen hadde oft die ouerlast onontseghet en_ weert dat die niet rechtes en_ bescheydes bij dier Stat en_ ons bliuen en wolde / soe sal die stat en_ wi / dier voerscr_ stat hulp_e werden bynnen eere maent / op dier stat / ende onses selues ghewin en_ verlies Voertm_ soe / en sulle wi dier twier stede viende jn onse Stat buten oeren consente niet veylighen / Voertm_ soe en sulle wi / dier ander stede vyende niet holden oft huusen oft beholplic wesen / jn ghienrehande saken die hem te staden moghen komen ende dien voerscr_ steden onstade doen moghen / Voertm_ waert sake dat enighe lude quaemen jn onse stat die der ander stede yenighe vyende weren / en_ die stat oft yenich van oere weghen wolde claghen daer solde men ouer richten onvertrect Voertm_ soe en sulle wi noch soenen noch vreden buten dien andern twen steden voerscr_ sij en hebben mit ons eenen Eenparlike_ vrede oft soene / Voertm_ soe segge wi vyt jn alle_ desen voerscr_ pvnten dien Greuen van hollant ende sijne onderzaeten Voertm_ waert sake dat wi oft yenich van + den andern twen steden voerscr_ tot yenigher tijt sonderlinghen wille oft hardecheyt hebbe_ wolde jn yenighen pvnten voerscr_ soe wes dan die twe van ons oft van + den andern twen steden voerscr_ dar van ouerdroghen ? solde die dorde stat volghen also dattet dar mede dore solde ghaen / Voertm_ weert sake dat wi oft die twe stede voerscr_ vorbede hadden en_ ons mit dier voerscr_ stede een oft den twen steden voerscr_ wedervoer dat die stat bescheyt mochte hebbe_ bij dien twen steden dat mochten sij dan soenen oft vreden / dies solde wi oft die dorde stat / die de voerbede hadde volghen vytgheseghet h_en herberts van putten lijf en_ sloten Voertm_ alle saken de van desen pvnten en_ vorworde komen moghen / sullen wi mit den twen steden en_ die twe stede mit ons ghelike vytdraghen / Al arghelist en_ quaede behendicheyt jn allen desen pvnten en_ vorworden voerscr_ clarliken vytgheseghet jn kennisse dier waerheyt en_ om + vestenisse aller dinghe voerscr_ op~dat die stede en_ vast bliuen alz voerscr_ js / soe hebbe_ wi onser stat zeghel an desen brief doen hanghen Gegheuen jnt jaer ons h_en Dusent drie + hondert vijf en_ tsouentich op sante jacops auent dies heylighen Apostels