Corpus Van Reenen-Mulder (CRM14): Oorkonde F590r38501

Wij Scepen en_ Raet der Stede van zwolle en_ van campen Maken kondich Allen luden dat wij om dat onrecht te wederstaen . dat onsen borgeren dicwijle voertijts gesciet is en_ noch dagelix sciet aen oere erfnis die sij hebben / soe hebbe wij eenpaerlic mit goeden berade om nvtheit en_ orbare onser meynre borger ouerdragen en_ malc den anderen erflic gelouet in goeden trouwen jn desen vorwaerden / weer enich man of wijf geestelic of werlic / die enich onser borger Renthe of erve dat hem aen~geervet is of noch aen~geervet sal werden / of dat sij gecoft hebben en_ noch copen soelen dat sij jaer en_ dach onbesproken beseten hebben alse recht is af~wynne_ wolden mit anderen rechte dan daer sij dat in beseten hebben / dat wij dat malc den anderen eenpaerlic soelen helpen keren / en_ onse borger in oeren beseten goede holden gelijc dat voers_ is op onser Stede cost en_ arbeyt sonder onsen weder~seighen beholdelic onser beijder Stede wilcoer bynnen onser Stede vryheiden voert so loue wij vastelic malc anderen in allen maniren alse voers_ is Weert sake dat onse here die bysscop van vtrecht of ymant van sijnre wegen op enige tijt onser Stede enich of enigen van onsen borgheren in enigen saken hoe dat die gestellet siin veronrechtede / en_ onser Stede enich bij oeren rechte en_ gewoente niet laten en wolde / dat soel wij malc anderen ewelic helpen weder~staen ende keren mit al ons_ macht sonder enigerhande wederseyghen en_ oec en sal onser en gene enen bysscop van vtrecht ontfaen . wa_neer dat oers ene aflyuich geworde_ is hij en hebbe beyde onsen Steden ijrst onse priuileg?~rechte en_ olde woente geco_firmiert in al + der bescr? formen Al argelist hijr in vytgeseget Jn kennisse der waerh? ende in een tuech aller dinghe voers_ soe hebben wij onser twyer Stede segel voors_ an desen brief gehanghen Gegeue_ jnt jaer ons heren . dusent drie + hondert Tachtentich en_ vyue op den palme~dach